Stephanie Mary ngemegah Sarawak

KUCHING: Atlit angkat berat indu Sarawak udah ngemegah nama menua pengudah mujur mai pulai dua midul emas enggau dua midul pirak dalam Pekit Angkat Berat Klasik Asia 2019 di Almaty, Kazakhstan.

Stephanie Mary Ensol, 31 taun asal ari Kampung Remun, Serian bulih midul nya pengudah mujur dalam sekeda kategori baruh 47 kilogram indu.

Pematih Angkat Berat Malaysia, Neil Pick madahka anak diajar iya tu suah bulih midul emas dalam pekit serantau entara Malaysia enggau Singapore.

“Ba renggat nasional, iya kala bulih empat midul emas enggau lima midul pirak dalam Lumba Komanwel di Kanada enggau Asia Pasifik di Australia.

“Perambu ungkup taun baru, iya deka bepekit ba Pekit Asia Selatan di Bangkok kena bulan April enggau Pekit Dunya diatur kena bulan June,” ku iya lebuh dirandau pemberita, ditu lemai tadi.