BETONG: Pengawa nguasa Sains, Teknologi enggau Inovasyen (STI) pugu besai mai Sarawak nuju nengeri maju manggai 2030.

Kaban Parlimen Betong, Datuk Dr. Richard Rapu madah, pengawa neleba tumu nembiak sekula primari enggau STI nyadi siti pengawa beranak puku dudi hari. Iya madah, pekara nya beguna amat dikena nempa rebak kreatif, pintar teknologi enggau ulih besemekih.

“Tu ukai semina program sekula, tu pasal kuing dudi hari bala anak kitai iya nya inijinir, saintis, inovator digital enggau pakar kuasa gadung ti deka nyungkak pemansang Sarawak,” ku iya.

Richard bejaku munyi nya rambau Karnival STI MADANI ti diatur di Sekula Primari (SK) Nanga Ajau ditu, empai lama.

Tampung iya, Sarawak diatu benung nyikap diri nyadi penengkebang teknologi seriris enggau pemansang sektor pemintar digaga (AI), hidrogen, automasyen, bioteknologi enggau ekonomi digital. Taja pia, ku iya, semua nya begunaka modal mensia dudi hari ti landik enggau nguasa STI.

Ba karnival nya, iya bepeluang ngabas 10 reruai pemandang inovasyen nembiak ti ngaul pengawa robotik, pengetan pemakai, hidroponik, kuasa solar, roket ai, dron, 3D pen enggau pemansang prototaip. Nangkan nya, tim Solar Energy Team mujur dipadu nyadi champion pekit reruai pemandang lalu Hydroponic Team ba penuduk kedua sereta dientudi ke Food Preservation Team ba penuduk ketiga.

Bela disua iya nya anugerah khas ti ngemataka Solar Energy Team menang dua kategori iya nya Best Presenters Group enggau Most Creative Team lalu Water Rocket Team nerima anugerah Most Cooperative Team. Bela datai, Sapit Pegawai Pelajar Pelilih Betong, Huriah Yatim, Kepala Pengajar SK Nanga Ajau, James Ali, Chairman Gerempung Kepala Pengajar Malaysia Pelilih Betong, Minggu Ujak, Yang di-Pertua Gerempung Apai Indai enggau Pengajar (PIBG) SK Nanga Ajau, Rahynold Rehenggia sereta Chairman Komiti Pemansang Pelahar Layar (LEDC), Paul Langgang. – EDISI UKAS