Sukat kelingi tanah NCR ngena Seksyen 6 – Seksyen 18 lanchar

KUCHING: Perintah Sarawak semina udah nerima RM 10.75 juta ari RM21.5 juta penyampau belanja dikena nyukat tanah NCR Seksyen 18 enggau sukat kelingi tanah NCR digazet di baruh Seksyen 6.

Ku Menteri Muda Perambu Mengeri, Pengatur Tanah enggau Rampa Menua Datuk Len Talif Salleh, sebedau tu Perintah Besai nengah Menteri Kereja Raya udah ngemendarka agih belanja dikena nyukat tanah NCR di baruh Seksyen 18.

“Enti kesemua agih belanja penyampau RM10.75 juta dikena nyukat tanah NCR Seksyen 18 aja, semina 43, 699 hektar tanah ulih disukat di baruh Seksyen 18 taun tu seraya tanah 686,355 hektar disukat ngena Seksyen 6 agi nganti gintir nengah lot siku-siku,” ku iya.

Len Taliff nyaut tanya tambah ari Adun Tamin, Ir Christopher Gira Sambang pasal ni pemesai tanah NCR ke udah disukat enggau udah digazet sereta diberi pala tanah.

Nya kebuah Perintah Nengeri ngagihka belanja penyampau RM40 juta dikena ngemujurka pengawa nyukat tanah NCR ungkup taun 2019, ku iya.

Datuk Len Talif Salleh

“Pengari rayat ti dipadu nyadi menteri renggat perintah besai patut minta agih belanja besai agi ungkup Sarawak nentuka tanah NCR deka disukat sereta diberi pala tanah.

“Perintah Sarawak mega udah ngemendarka pinta nambahka 467 iku pemesai baru ti deka berengkah gawa dalam bulan Julai tu ngambika ulih ngerumban pengawa nyukat tanah di baruh Seksyen 18,” ku Len Taliff.

Kelimpah ari nya ku iya, naka 31 Mac urung 74,602 hektar (184,342 ekar) tanah udah digazet nyadi Rizab Komunal Bumiputera (Betanam Betupi) di baruh seksyen 6 Kanun Tanah Nengeri (KTN) di Dun Tamin.

“Ba renggat kedua, urung 63 pala tanah di baruh Seksyen 18 KTN udah diberi nyengkaum tanah 163 hektar tauka 403 ekar pemesai ti disukat Renggat Keterubah Program Nyukat Tanah NCR Inisiatif Baru.

“Urung 87,544 hektar tanah NCR sitak Dun Tamin udah dikemendar disukat kelingi di baruh inisiatif baru tu lalu ari penyampau nya, 86,567 hektar udah tembu disukat kelingi,” ku iya nyaut tanya Adun Tamin.

Seraya empat kandang menua enggau 37,626 hektar pemesai udah dikemendar disukat individu nengah inisiatif baru tu sereta 1,531 hektar tauka 3783 ekar tanah udah tembu disukat lalu 593 lot udah diagih.