Johnny Anak Chuat asal ari Rumah Mujah, Nanga Menyebat, Lemanak, Engkilili diatu udah mujur numbuhka siti stesyen radio online dalam jaku Iban asil ari pangka pemansang teknologi digital.
Maya dirandau Suara Sarawak, Johnny madah stesyen radio tu digagaka iya nama Pegari WebFM, ngambi nama majalah Pegari ke endang lama udah tebilang sebedau tu.
Tambah mega, ku Johnny majalah Pegari ke kala dichelak Borneo Media Solutions (BMS) penyampau 63 Volume mega ditengkebang iya empu sebedau ke diketu naka taun 2018.
Stesyen radio tu berengkah ulih didinga ari serata dunya ke bisi arus internet kena 17 Februari tu tadi. Kenu ku Johnny, ba minggu keterubah nya radio tu bedau tentu lanchar iga ketegal mayuh kereban bedau engkeman diatur sereta penemu mega agi kurang.
“Agi belajar kebendar iya. Nyadi stesyen radio Pegari WebFM tu diempu aku 100 peratus, nadai dibantu sapa-sapa tauka ni-ni organisasyen.
“Kesemua idea nengkebang stesyen tu endang datai ari diri empu, dipelanja diri empu lalu dipejalaika aku kediri aja mega naka ke diatu.
“Buah penemu ngaga web radio baka tu ngenyit tebantai lebuh aku nemuai ngagai siti café ba menua Lagos, di Nigeria, Afrika Tengah empat taun ke lalu.
“Ba Café nya, aku bisi ninga DJ bejaku lalu nebah lagu lalu dikumbai aku radio aja, tang aku meda bala-bala dia ulih minta DJ nebahka sida lagu. Tang DJ nadai dipeda.
RADIO INTERNET
“Udah nya aku lalu nanya orang ke bempu café nya lalu iya madahka nya radio internet ke bepengkalan ba Cape Town, Afrika Selatan ke beribu batu penyauh ari endur kami ke benung ngelantangka ati dia, iya nya indu nengeri menua Nigeria,” ku iya mulaika pengingat diri.
Udah nya, ku Johnny ari palan nya, bala peninga ulih nganjung pesan pandak (SMS) terus ngagai DJ ba Cape Town, lalu ari stesyen pemanchar (server) di Cape Town, DJ bejaku lalu nebah lagu peminta sida ke benung beperindang dia.
Pemulai ari menua Afrika Tengah taun 2015 pengudah ngetu gawa ba menua Warri, Nigeria Johnny madah diri bedau bisi ati deka numbuhka stesyen web radio kediri laban ngira diri nadai pengelandik ba sentang IT (Teknologi Infomasyen) laban stesyen baka nya sigi begunaka penemu baka nya.
“Nyau empai lama aku ke nguji, tang bedau ka nyadi iga. Enti semina ditebahka lagu-lagu aja, nya nadai penanggul lalu enda begunaka pengelandik ba IT.
“Tang aku deka ngaga stesyen nya befungsyen baka stesyen radio bukai, ke bisi DJ lalu ulih dipantau ba komputer diri empu.
“Dia mih penanggul iya berupai tebantai besai, laban mesti begunaka software broadcasting ke mesti ditekang tauka di’configure’ ngagai stesyen pemanchar (server).
“Nyadi server radio tu nya ba menua Estonia, Utara menua Eropah. Kebuah pia, laban ba Malaysia, aku enda tetemuka alai ke ulih nyediaka server radio. Stesyen tu semina dipejalaika ari SOHO (Small Office Home Office) aja.
“Iya dipeda mudah tang taja pia iya begunaka kereban fizikal ginti tauka sofistikatet baka ‘audio mixer’ enggau mikrofon lalu disikap enggau komputer ke bekuasa besai ari sukut ‘motherboard’, kad bunyi, kad grafik enggau ‘Hard Disk Drive’ ke deras tauka laju.
“Udah nya, iya begunaka ‘broadcasting software’ ke pemadu baru awakka engkeman lalu mudah diterima stesyen pemanchar tauka server ba menua Estonia din,” ku iya nerang silik.
DITEBAH 24 JAM
Tu mega siti penanggul laban begunaka belanja ke numbas iya pemayuh; bebelika kereban fizikal sereta mega kereban ‘broadcasting software, sound editing software sereta bebayarka server.
Pegari WebFM tu ditebah 24 jam tang taja pia ke diatu aku semina nebah lagu-lagu ke diselitka infomasyen rama mimit. Kebuah pia, aku agi deka ngerembaika publisiti awakka mayuh agi peninga.
“Ke dudi ila, mayuh program ke udah dilanggur ke disadang ulih narit ati peninga kelimpah ari meri infomasyen ke beguna sereta nguntungka orang mayuh.
“Ambika banding; segmen betanam betupi, segmen pelajar sekula tauka peransang, komputer, dagang, penemu rama enggau mayuh agi ke bukai,” ku iya.
Nyadi ke diatu, penyampau peninga udah maksima seretai ninga nya 2896 aja, kena ke 13 March hari nya ke ulih ditemu aku ari riport ke bisi ba ‘control panel’ dalam komputer aku.
Sekeda ari nama peninga online ke bisi ninga radio tu ari menua luar nitihka data ke bisi rejister ba laman web tu iya nya Martin Entamin ari Abu Dhabi, United Arab Emirate, John Isut (Kakinada, India), Markus (Pontianak, Indonesia), Herry Nyanggau (Nanga Badau, Kapuas Hulu), Vincent Enting (Amsterdam, Belanda), Kent Arhur (Oslo, Norway), Baling anak Giong (Vungyau City, Vietnam), Johnson Cym (Taiwn) enggau ke bukai.
Ukai semina penyampau peninga aja, tang palan alai peninga pan ulih dipeda aku. Penyampau peninga ke ningaka radio web tu seretai, enda tentu ulih ditagaka pia aja.
Peninga ari luar Malaysia mayuh ninga maya kitai ditu malam hari lalu peninga ba Asia tu mayuh ninga maya kitai ba Malaysia tu siang hari. Pemayuh peninga deka belipat maya ujung minggu.
“Nyadi stesyen radio tu nadai sangkut-paut enggau politik menua Malaysia, baka idung entara mata, baka dilah entara nyawa. Neutral. Lebih lentur ngagai pemerindang lalu nyelitka pekara-pekara rama enggau penemu ke ditaga ulih nyungkakka ekonomi enggau penemu komuniti peninga,” ku iya.
Nambahka ke nya, ku Johnny, lagu-lagu Iban ke ditebah nya semina lagu-lagu penanyi ke kala diberi kami publisiti nengah Majalah Pegari enggau Majalah Senawah ke suba.
“Taja pia, sema bisi penanyi enda setujuka lagu-lagu sida ditebah kami, sida tau madah ngagai aku. Pia mega penanyi ke deka ngasuh nebah lagu sida, nadai salah madah.
“Ba sentang tu kami nadai bepinang benibung laban kami endang gaga ati meri publisiti ngagai semua bansa Dayak, enda ngira sida nya udah kala dipansutka kami ba majalah kami ke suba tauka bedau,” ku iya.
Penerang ke lebih silik tauka deka minta ditebahka lagu ba radio Pegari Web FM mensia mayuh ulih nganjung pesan nuju lumur WhatsApp 013-5755769.
