KUALA LUMPUR: Malaysia nerima Tuai Menua baru pengudah Sultan Johor, Sultan Ibrahim diangkat nyadi Yang di-Pertuan Agong ke-17 dalam istiadat penuh tradisyen diatur di Istana Negara di Kuala Lumpur tadi.
Pengudah nyain surat sumpah mangku pengawa nyadi Yang di-Pertuan Agong ke-17, nya ngelai timpuh merintah lima taun Sultan Ibrahim nyadi payung enggau penyerakup menua belabuh baka ti diturai dalam Konstitusyen Perintah Besai.
Sultan Ibrahim, 65, lebuh angkat sumpah mangku pengawa besemaya deka bejalaika perintah enggau lurus sereta ngaku deka naka ulih nyaga enggau ngetanka pengarap Islam, pengelikun enggau pengelantang rayat.
Istiadat kemari mega meda Sultan Perak Sultan Nazrin Shah, angkat sumpah enggau nyain surat sumpah pangku pengawa nyadi Sapit Yang di-Pertuan Agong, ngenapka agi sistem raja beperlembagaan ti dikemeranka menua.
Sultan Ibrahim enggau Sultan Nazrin Shah dipilih bala Raja Melayu rambau Aum Kaunsil Raja ke-263 (Khas) di Istana Negara kena 27 Oktober taun nyin tadi, lebuh Al-Sultan Abdullah Ri’ayatuddin Al-Mustafa Billah Shah abis timpuh nyadi Yang di-Pertuan Agong ke-16, kemari.
Naka diatu, Malaysia udah ngasai dipegai 17 Tuai Menua ngena chara begintir lima taun sekali ari semilan raja Melayu.
Dulu ari nya, rayat ari mayuh serak udah nganti tumu pagi di sepemanjai jalai entara Istana Bukit Serene nuju Padang Bilun Antarabansa Senai di Johor kelimpah Pengkalan Soldadu Langit DiRaja Malaysia Subang, Selangor deka ngerami Sultan Ibrahim mupuk nyadi Tuai Menua ungkup lima taun. – BERNAMA
