SUPP minta penuduk pulai ke asal

KUCHING: Penuduk Menteri Wang Kedua patut diberi ngagai Kaban Kunsil Nengeri (Adun) ari Parti Sa’ati Rayat Sarawak (SUPP), ku Chairman SUPP Simanggang Datuk Francis Harden Hollis.

Ku iya, diatu apin bisi chalun ti patut ngisi penuduk nya pengudah ex-Menteri Wang Kedua Datuk Wong Soon Koh nyurutka diri ari kabinet nengeri.

Tambah mega ku iya, penuduk nya patut diberi ngagai SUPP laban endang asal iya diempu parti sida ari suba.

“Baka utai dipadah Datuk Patinggi George Chan ensanus endang amat, penuduk nya endang patut diberi pulai ngagai SUPP.

“Iya mega kala nyadi Menteri Wang Kedua sereta ex-Presiden SUPP sebedau diambi Soon Koh,” ku iya.

Harden mansutka jaku nya lebuh dirandau pemberita pengudah bejadika pengerami Nutup Kem Jati Diri Perintah Servis Komuniti Zon Sarawak, Sabah enggau Wilayah Persekutuan Labuan Palan Latih enggau Kem Eko Sumiran ditu pagi tadi.

Sebedau George Chan, penuduk nya endang dipenggi sida ari SUPP, ku iya nandu.

“Nya kebuah kami minta pengudah Soon Koh nyurutka diri, penuduk nya patut dipulaika baru ngagai kami, pulai baka asal.

“Taja pia, semua tu bepanggai ba presiden parti kami ke diatu, Datuk Sim Kui Hian enggau Kepala Menteri Abang Johari Tun Openg nentuka sapa bagi patut menggi penuduk nya,” ku iya madah nyemetak.

Ensanus, ex-Presiden SUPP Datuk Patinggi George Chan mansutka penerang ke alai komuniti China chukup benasip kelebih agi enti penuduk Menteri Wang Kedua diberi ngagai parti sida.

George Chan ti mega ex-Sapit Kepala Menteri sereta ex-Menteri Wang berengkah ari pun taun 1990 madahka penuduk Menteri Wang Kedua endang asal dipenggi SUPP.

Suara Sarawak