S’wak bisi pemansut belanja bukai

KUCHING: Sarawak deka bisi pengulih chukai jualan komoditi bukai ba pengawa ngemansangka penatai pemisi menua tu.

Kepala Menteri Sarawak Datuk Patinggi Abang Johari Tun Openg madahka diri benung ngiga chara baru ba tuju pengawa nya.

“Bepelasarka kontitusyen, kitai ulih bejalaika chukai jualan baka pejalai chukai jualan minyak enggau gis laban tu aja pemansut komoditi ti dikemisi menua kitai.

“Nya alai, aku ngiga komoditi bukai ti ulih dikenaka chukai jualan ari pemansut baru,” ku iya.

Abang Johari mansutka pekara nya lebuh nyadi temuai dipebasa ba Pengerami Bejarah Gawai Raya ti diatur serikat telikomunikasyen Sacofa ba Palan Aum Konvensyen Kuching (BCCK) ditu, tadi.

Kelimpah ari nya, kereban udah bisi tang penerang pasal chara baru nya apin ulih diterang silik.

“Chukai jualan ukai semina datai ari siti komoditi aja tang mayuh komoditi enggau produk bukai bepanggai ba peminta.

“Tang aku andal kitai udah bisi sekeda ti bepengulih dikemansang semina aku enda ulih madah diatu,” ku iya.

Ku iya, enti peminta majak nambah pekara nya deka mansutka mayuh agi penatai pemisi ngagai menua.

Ensanus, surat berita di menua tu madahka Sarawak merambu deka ngasilka oksigen enggau angin beresi ti dikumbai Borneo Vitality ari Sarawak Energy Berhad.

Ngelansa sentang pekara besai ti deka ditusi pengudah Hari Raya Abang Johari madah iya endang enda nemu.

“Aku enda nemu. Naka diatu nadai bisi ubah ba kabinet lalu enti sema bisi nya pengawa baka selama,” ku iya nyaut pemberita.

Sama datai Menteri Industri enggau Pemansang Pengawa Dagang Datuk Amar Awang Tengah Ali Hasan, Menteri Utiliti Datuk Sri Dr. Stephen Rundi Utom, Menteri Muda Utiliti (Elektrik) Menua Pesisir Datuk Dr Abdul Rahman Junaidi, Mandal Chairman Sacofa Datuk Syed Ahmad Alwee Alsree, Direktor Besai Sacofa Mohamed Zaid Zaini enggau Kaban Parlimen Mukai Datuk Hanifah Hajar Taib.

KENANG BEGULAI… Datuk Patinggi Abang Johari Tun Openg (duduk lima kanan), Datuk Amar Awang Tengah Ali Hasan (duduk empat kanan), Datuk Sri Dr. Stephen Rundi Utom (duduk dua kanan), Datuk Syed Ahmad Alwee Alsree (duduk enam kanan), Mohamed Zaid Zaini (duduk tiga kanan) enggau bala staf Sacofa begambar ungkup kenang.