KUCHING: Perintah Sarawak sedia meri kerejasama ngagai Indonesia ba sebarang pekara ti diguna sida enti sema perambu mindahka indu mengeri Indonesia ngagai Kalimantan mujur dipejalai.

Kepala Menteri Datuk Patinggi Abang Johari Tun Openg madahka sida sedia mantu nyengkaum nyendiaka bekal kuasa karan.

“Kitai sedia mantu enti sida begunaka bantu ari menua tu.

“Ambika chunto, kitai deka mantu nyendiaka bekal kuasa karan enti sida begunaka tambah bekal kuasa nya laban kitai diatu udah nyendiaka bekal kuasa karan ngagai Kalimantan Barat,” ku iya madah ngagai pemberita ditu, kemari.

Perambu mindahka menua Indonesia ti udah manggai taun ke sepuluh deka nyadi nyata pengudah Presiden Joko Widodo (Jokowi) milih Kalimantan Indonesia di Borneo nyadi indu mengeri baru.

Ku Menteri Pemansang Indonesia Bambang Brodjonegoro, Kalimantan nyilih Jakarta nyadi indu mengeri pengudah Jokowi tepantup ati rambau pejalai iya ngabas endur nya.

Nitihka ripot ba Kompas.com, indu mengeri baru endang amat di Kalimatan semina bedau nerang silik pasal pekara nya.

Ba bulan Mei tu tadi, Jokowi udah mantaika penerang pasal indu mengeri dipindah luar ari Pulau Jawa, kebuah pia laban menua nya udah kelalu sekut.

Naka diatu, berita ngerimbas pending madahka bisi dua endur engka deka dipilih pengudah Presiden Jokowi suah ngabas endur nya baka Bukit Soeharto, Kalimantan Timur enggau kandang menua Segitiga enda jauh ari Palangkaraya di Kalimantan Tengah.

Bukit Soeharto tu kandang menua entara Panajam Paser Utara enggau Kutai Kertanegara.

Endur tu ditemu strategic laban entara Samarinda enggau Balikpapan, dua mengeri pemadu besai ba Kalimantan lalu kededua menua nya bisi padang bilun.