SWEETY SAYAU nya single ti keenam ari Isa Lee pengudah iya ngeluarka single Tubai Pengerindu ti lalu ditangkanka Enda Disadang, Bula Enggai, Sulu Aku Ambai Orang enggau ke bukai.
Ku iya, pun penatai penemu ngaga lagu Sweety Sayau nya mansa ba runding pemuas ti ningaka lagu rentak rock and roll orang ribai. “Ati aku lalu lekat ba rentak nya laban lagu aku sebedau tu mayuh agi lagu lubah berentak balada.
“Nya alai, sekali tu aku kira deka ngalih rentak bukai lalu bisi mega ke modal aku maya merindang orang ba panggau iya nya kekadang mai lagu ranchak,” ku iya lebuh dirandau Suara Sarawak empai lama.
KABAN FACEBOOK
Isa Lee madah, Sweety nya siku indu ti dikelala iya ari Facebook. “Pemuas ti bekaban ba Facebook, aku nyau bisi ati deka bekelala lebih dalam enggau iya. “Laban sama bela setuju, dia aku enggau Sweety terus nyadi sulu.
“Nyadi lagu Sweety Sayau digaga dikena aku ngingat sereta ngelaika tanda pengerindu kami duai besulu ti bepun ari media rama,” ku iya.
PENGIDUP MENSIA
Ku Isa, muzik lagu Sweety Sayau digaga nunda pelasar tusun muzik orkestra ti ditambah ngena backing vocal ngambi aura lagu beraban 70-an suba.
Iya mega madah, nyau deka semua muzik lagu ti disadaka digaga ba Cami Tan ari Lock and Load Studio Kuching.
Iya madah baru, muzik lagu Sweety Sayau tu bisi kuasa atas pengidup kitai mensia iya nya nemu ngasuh tusah enggau nemu mega ngasuh lantang.
“Muzik Sweety Sayau nyangka nyelai mimit ari lagu bukai, laban iya ulih meri pengering ati lalu meri peransang kitai lebih positif sereta regas agi ngereja pengawa.
“Sweety Sayau manah didinga semua tikas umur, indu tauka laki sereta biak tauka tuai,” ku iya.
GENRE LAGU
Ngenang bekaul pengawa nebah lagu Iban diatu, Isa Lee madah ke pemansang industri muzik ukai bepanggai ba pemayuh lagu enggau artis. Ku iya, pemansang nya bepanggai ba ubah ari sukut genre lagu ti betambah sereta ngena tusun muzik ti berubah ari gaya muzik Iban.
“Reti nya, lagu enggau muzik kitai enda mansang seagi kitai nitih tauka bechuanka lagu enggau muzik ti udah udah. “Genre muzik mesti betambah sereta ngembuan tusun muzik ti baru.
“Muzik tu baka fesyen pekayan, enti fesyen nya enda berubah, reti nya iya nadai pemansang,” ku iya.
AWAK BEREGA
Isa Lee ti mega siku pinchin ari pengawa perintah madah, awak maya lepa iya betambah tang iya diatu nyau kiruh enggau bala uchu ti benung besekula.
“Enti enda belagu, aku suah agi ke kebun, merindang ati diri meda utai tanam seraya mansutka peluh.
“Diatu aku udah nyadi artis tetap belagu ba Langkau Arau Rumah Asap Dayak Kuching ninting Hari Empat, Hari Lima enggau Hari Enam,” ku iya.
Iya ngarapka Sweety Sayau ulih merindang bala peninga kelebih agi sida ti rinduka rentak ‘rock and roll’.
SEMUA TAU NUNDA
Ku iya, lagu tu chukup engkeman ngagai sida ti bisi band laban sida ulih ngujika penau diri nunda muzik Sweety Sayau.
“Terus sukung lagu baru enda ngira sapa artis nya laban semua lagu bisi pengelemi enggau pengelebih kediri.
“Lagu nya drama lalu nyema drama begulai enggau muzik, iya tetap ulih merindang kitai semua.
Maju lagu enggau muzik kitai Dayak!” ku iya.
