KUCHING: “Surat kabar tabloid lebih nyamai dibai kini-kini dibanding enggau surat kabar dichelak besai,” ku Editor Eksekutif New Sarawak Tribune Rajah Murugaiah.
Kenu ku Rajah, nembiak rebak baru rindu agi meda surat kabar tabloid laban lebih nyemetak.
“Serak tu mega kami fokus ngagai artikel komuniti, isu kemaya hari, politik, lumba enggau main, pemerindang enggau cherita khas,” ku Rajah.
Tandu Rajah, New Sarawak Tribune deka lebih fokus ngagau artikel komuniti enggau utai ti ngelingi sida.
Iya madah munyi nya rambau dirandau pemberita ba Opis New Sarawak Tribune, ditu kemari.
“Kami mega agi ngetanka sekeda sukut ke bisi dalam surat kabar diatu tang iya dichelak chara tabloid,” ku terang Rajah.
Rajah madah New Sarawak Tribune bepun dichelak 1945 lalu nyadi surat kabar jaku English keterubah ba Sarawak.
“Sarawak Tribune ditutup taun 2006 ketegal penyarut ke nyadi,”ku Rajah.
Tandu Rajah, Sarawak Tribune diberi nama baru The Eastern Times dichelak dalam tabloid.
“The Eastern Times nukar chara tabloid ngagai surat kabar besai laban maya nya mensia mayuh kurang rindu ngagai tabloid,” ku Rajah.
Rajah ngarap New Sarawak Tribune terus nyadi surat kabar ti mantaika sebana rayat sereta nusi cherita pasal sida.
