KANOWIT: Tadika Hikmah Kanowit ngetuka dulu pengawa besekula sida ketegal penusah ampuh bah pengudah tama ai ari Sungai Rajang ti benung pasang raya sehari tu.
Tuai Balai Bomba enggau Penyah Penusah (BBP) Kanowit, Arrahman Chik madah, raban sida udah matau bah dia pengudah beratika gaya utai ke nyadi pagi tadi.
Berindik ari nya, dua raban sida udah diasuh matau Tebing Ai Kanowit enggau mega di Pasar Kanowit urung pukul 10 pagi.
“Kami meda Masjid Arrahman Kanowit ampuh kira sekaki seraya Tadika Hikmah Kanowit nadai besekula ketegal ampuh bah.
“Seraya rentayan jalai belakang Pasar Kanowit ampuh setengah kaki lalu gaya utai ke nyadi agi ulih dijaga,” ku iya lebuh dirandau tadi.
Arrahman madah baru, gaya hari diatu agi mambam lalu tikas ai sungai agi niki tang agi ulih dijaga.
Bela ampuh pasang raya tadi ku iya, Jalai Lukut-Penyulau enggau penama 1 ngagai 2 kaki ke alai jalai nya enda ulih ditengah semua bansa entukar.
Berebak enggau nya, Opis Penyaga Orang Periman Malaysia (JPAM) Pelilih Sibu ngeripotka Jalai Besai Rantau Kemiding/Jalai Lipus ampuh urung sekaki peninggi.
Ku ripot nya, semina entukar 4WD enggau entukar besai aja ulih nengah jalai nya tadi.
“Ujan bangat enda ngetu kenyau ari malam Hari Tiga diumbaka ai pasang raya ngujungka kandang menua baruh di Pelilih Kanowit ampuh,” ku Pegawai JPAM Pelilih Sibu, Mej (PA) Wan Mohd Jabir Wan Mohd Badrudin.
Nambah ke nya, di mengeri Sibu mega bisi nyadi tama ai pasang raya ba sekeda jalai baka Jalai Khoo Peng Loong, Jalai Lanang, Jalai Kong Yit Khim enggau Jalai Bako.
Penusah nya nyadi urung pukul 10 pagi berindik ari tikas ai Sungai Rajang majak niki.
Taja pia, jalai nya agi ulih ditengah semua bansa entukar lalu gaya hari nyau tengah hari tu majak manah.
