Taman tema Borneo deka dibuka ba Kota Samarahan

KUALA LUMPUR: Taman tema Borneo keterubah ngena konsep ‘virtual reality’ (VR) deka dilancharka Serba Dinamik ba Kota Samarahan kena bulan March tu.

Direktor Pengatur Pengawa Gerup Serba Dinamik enggau Ketuai Pemesai Eksekutif, Datuk Dr Ir Mohd Abdul Karim Abdullah pechayaka Taman D-Maya nya ngundan mayuh pekara ti ngerindang ati bala temuai enda ngira renggat umur.

“Projek tu nerima sukung ari Perintah Sarawak sereta mayuh ejensi bukai dilanchar ba sitak tu.

“Kebuah pia lama taman tema Borneo tu meri mayuh pemanah ngagai mayuh piak,” ku iya seraya madahka taman tema keterubah di Malaysia disikap ngena VR nyengkaum teknologi hologram.

Ku iya, kelimpah nyadi palan pemerindang, penemu Taman D-Maya nya dikena nempa kaul enggau rebak biak ngambi sida ngembuan kreativiti nipakka pemansang kemaya hari.

Taman nya deka nyendiaka mayuh main bepelasarka konsep VR nyengkaum simulasyen penerebai ti dikumbai VR Elevation D’Luxe enggau simulasyen endur perang, VR Knight Rider.

“Kitai gawa enggau serikan pemun di Sarawak iya nya Startup Borneo ngambi ngelancharka agi atur pengawa lebuh ngelancharka taman tema Borneo tu,” ku iya lebuh dirandau ba Menara Serba Dinamik, ditu ensanus.

“Kitai udah beranakka puku penyampau RM8 juta dikena ngemansangka taman tema enggau bekunsika belanja penyampau RM5 juta begulai enggau Startup Borneo lalu semua belanja tu sepenyampau RM13 juta,” terang iya silik.

Servis bukai ti bisi disediaka ba taman tu iya nya Giga Virtual Café ti ngatur mayuh aktiviti ngagai bala temuai.

Nya alai, Serba Dinamik nagit setengah juta temuai ninting taun ngagai taman tema Borneo sekalika ari menua tu enggau menua luar.

Suara Sarawak