MIRI: Penegrami malam main asal ‘Taste Of Borneo’ 2.0 udah mujur ngempuru pupu bansa begulai berami.
Kaban Kunsil Nengeri (ADUN) Telang Usan Datuk Dennis Ngau muji raban pengatur pengerami nya laban pengawa serumpu makai enggau mandang main asal mujur ngempuruka semua bansa.
Ku iya, pupu bansa ti datai ari mayuh asal penatai bela gagit berami begulai enggau pangan diri lalu tanggam kaul entara sida tegut agi.
“Aku bisi dipadah, ngambi ulih begempuru enggau bekerejasama begulai enggau mayuh serakup endang nyadi batang tuju pengawa ti mar dijapai.
“Tang pengerami tu udah nunjukka kitai ba Miri nadai penanggul begempung taja bisi mayuh budaya, jalai pengarap enggau raban bansa,” ku iya.
Dennis bejaku munyi nya lebuh dipebasa bejadika Malam Main Asal ‘Taste Of Borneo’ 2.0 ba Stadium Tertutup Miri ditu ensanus.
Pengerami diatur Serakup Bansa Dayak Bidayuh (DBNA) Miri nya nyadi sebagi ari bemacham isi program Karnival Taste of Borneo pengelama 10 hari lalu tembu kena 29 Oktober tu.
