Teknologi 5G besai pangka ngagai ekonomi menua

KUALA LUMPUR: Menteri Komunikasi enggau Multimedia Gobind Singh Deo madah pengawa bekenaka teknologi rebak kelima tauka tampak agi dikumbai teknologi 5G deka meri pangka ti besai ngagai ekonomi Malaysia.

Ku iya, pengawa bekenaka teknologi nya mega deka meri pangka ba chara kitai ngelangkar komuniti ti sedia napi ekonomi jeman baru nuju Revolusi Industri Keempat (IR4.0).

“Aku ngarap semua ulih beratika pemesai guna pekara teknologi tu enggau baka ni iya ulih nukar chara kitai bejalaika dagang enggau industri menua dudi hari.

“Tu sebengkah pekara ti semua kitai patut ngaul diri lalu iya patut diperati ngena runding positif sereta patut bisi pengandal ba diri,” ku iya rambau program randau pasal Pemujur Pengawa Mandang 5G Malaysia ti dipancharka terus di TV3, pagi tadi.

Iya madahka Malaysia patut ngetuai enggau mantaika kitai nyata ukai semina ulih ngemansangka infrastruktur ti ulih bejalaika teknologi 5G aja tang kitai mega ulih mujur ba semua pekara industri ti deka bepanggai ba teknologi baru jemah.

Gobind Singh Deo

Pengawa Mandang Teknologi 5G ti dilanchar Menteri Besai Tun Dr Mahathir Mohamad kena 18 April tu tadi, nampung pejalai pengawa Multimedia Super Corridor (MSC) kenyau ari 23 taun ke udah lalu tu nyadi pemujur iya ti nyata.

Pengawa ngujika teknologi baru nya di Cyberjaya enggau Putrajaya nyadi projek pemungkal pengelama enam bulan berengkah ari pun bulan tu.

Gobind madahka Malaysia patut nyendiaka diri enggau ngelempaika pengandal ke alai Malaysia ulih nyadi hab dalam pengawa bekenaka teknologi 5G sereta nyadi chunto ngagai menua bukai.

Kelimpah ari nya, iya andal Malaysia ulih matak mayuh agi pemeranak puku ari serikat luar enti sema menua bisi rentayan ti teguh enggau tegap kelebih agi dalam teknologi 5G.

Gobind ti mega MP Puchong madahka perintah bejalaika pangku pengawa beguna enggau besai amat ngenataika penerang silik ngagai serap komuniti baka ni teknologi 5G ulih ngemanah enggau nyungkak tikas idup sida kelimpah beratika pekara insentif ti ulih meransang mayuh agi raban bekenaka teknologi tu.

“Tu pengawa diselinting perintah, nya kebuah kitai nyendiaka projek pemungkal tu dikena kami ngemai penyedar ngagai komuniti ke alai tu kuing tuju teknologi dudi hari, kitai patut sedia,” ku iya.