Temegah angkunka pengelandik jari

KUCHING: Seraban indu ari Kampung Kudei Baru Iban diatu temegah ati laban mujur nembuka Kelas Aksesori Marik Manik.

Nitih ku Laceylona Thomas, kelas diatur sehari nyentuk nya nerima timbal chukup manah ari bala penyereta kelebih agi sida ti angkungka pengawa pengelandik jari.

“Bala penyereta gagit endar ngiri penemu, belajarka chara ti betul nusuk leka manik nyadika marik tauka tengak.

“Sida mega chukup landik sereta bisi kreativiti diri empu ari embing enggau utai dipelajar ke alai semua asil tengak manding endar dipeda,” ku iya ke nyadi pengajar rambau kelas nya.

Iya mansutka jaku tu lebuh dirandau Suara Sarawak pengudah Kelas Aksesori Marik Manik diatur Biro Indu Kampung Kudei Baru Iban ditu, apin lama ke udah.

Ba lansa sama, siku ari penyereta benama Tuai Rumah Sangi Abu madahka diri chukup temegah ati laban tebal agi sida ke datai ngulu kelas sehari nya orang indu ke gawa ngintu ruang bilik.

Nya alai iya ngarap ari penemu ti dipelajar ulih nyadi pemansut belanja sereta nyungkak ekonomi bala kaban Biro Indu Kampung Kudei Baru Iban dia.

Dulu ari nya, Kelas Selampai Sulam enggau Kelas Aksesori Manik Fringe mega bisi diatur enggau tuju ke sama.

Ku iya, kelimpah ari kelas nya, sida mega bisi ngungkupka anugerah tauka tanda basa mega deka diberi ngagai nembiak nyulut, licha peransang ungkup nembiak napi peresa UPSR, PT3 enggau SPM.

“Tu setipak enggau rambai jaku nyadika malin biro kami, Sedada Kitai Seati, Setapak Kitai Sejari’ ke peransang ngemajuka diri enggau ruang bilik,” ku Tuai Rumah Sangi nyemetak.

Berebak enggau nya, Laceylona dipebasa nyuaka setipikit enggau tepa ngagai bala penyereta pengudah kelas tembu.

Suara Sarawak