KOTA SAMARAHAN: Jaguh tinju menua, Sapok Biki nyakap sida ke agi biak lebih agi peranak nengeri tu uji padamka nama iya ba rikod main tinju sereta tempa sejarah baru .
Pemujur enggau peneleba Sapok ba dunya tinju tu endang ngemegahka bansa kitai lalu ukai jaku sengapa.
Ku Sapok iya kala dilatih mayuh jurulatih nyengkaum Raban Soldadu Malaysia, jurulatih ari Thailand, Maxico, Cuba, Filipina enggau ke bukai.
“Aku kala beguro enggau jurulatih ari dalam enggau menua luar lalu mayuh peneleba sereta pengelandik ke ulih dikunsi aku ngagai sida ke biak.
“Aku deka nurunka semua penemu enggau pengelandik ke udah dipelajar aku ba main tinju tu ngagai nembiak ke dilatih,” ku iya.
Diatu, iya muka tinju nengah kelab ke diiring iya empu ba laman rumah di Kota Samarahan.
Ku Sapok, naka tu laman rumah nyadi palan ngelatih nembiak lalu iya begunaka laman ke lebih besai dudi hari endur ngelatih sida.
“Tuju kelab aku tu dikena ngajar sida ke biak sereta rinduka main tinju berengkah ari kusung nyentuk profesinal lalu tau dikena sida bepekit sekalika ba renggat nengeri tauka menua.
“Aku ngena laman rumah tu nyadi palan ngelatih nembiak nyema sida bisi penau aku deka nganjung nama sida awakka bepilih ungkup Lumba Malaysia (Sukma),” ku iya.
Kelab dibaruh iring Sapok Biki dipelaba deka diberi nama Sapok Biki Boxing Club tebuka ngagai semua nitih chara di Thailand.
“Kelab deka diberi nama aku empu laban aku deka sida ngembuan peransang enggau arapka kelab tu.
“Bayar panjar ungkup penyereta semina RM60 sebulan lalu belatih dua kali seminggu, aku nitih chara Thailand iya nya nyendiaka makai ngirup ngagai sida,” ku iya ke asal ari Simunjan.
Gawa nyadi Raban Soldadu Malaysia (ATM) ditu, Mejar Sapok Biki ngembuan setipikit Jurulatih AIBA-1 ti ngujungka iya ulih ngelatih sebarang tim ari Asia.
Gawa dalam ATM meri pengelebih ke chukup besai ngagai Sapok teulihka pemujur ba main tu bepun ari 1993.
Iya madah, sigi enda nyadi peninju baka sehari tu enti enda nyadi soldadu.
“Aku meri terima kasih ngagai piak soldadu ke udah mantu aku ngelama tu lalu sida mayuh meri kerejasama ngagai aku.
“Nama aku angkat udah aku bulih midul emas keterubah ba Lumba Komanwel ba taun 1998 di Kuala Lumpur,” ku iya.
