Tengah jalai ti sama, anang bepechah

KOTA SAMARAHAN: Anang nganti asi udah nyadi bubur tang kitai patut ngetanka nengeri kitai berengkah ari diatu, ku Kepala Menteri Datuk Patinggi Abang Johari Tun Openg.

Ku iya, kitai enggai Bumiputera ba Sarawak tu bepecah ketegal ajum orang ari menua bukai.

“Kitai sama dalam Parti Pesaka Bumiputera Bersatu (PBB) enggau Gabungan Parti Sarawak (GPS) patut bekayuh sereta.

“Enda ngira indu, nembiak tauka tuai, semangat kitai ba PBB patut nempuh nengah siti jalai ti sama,” ku iya.

Abang Johari mansutka jaku nya lebuh bejadika pengerami begulai enggau Armada Pemuda PBB Nengeri ti diatur di Dewan Suarah ditu, kemari.

SEPERAU…Kepala Menteri Datuk Patinggi Abang Johari Abang Openg, begulai enggau Sapit Kepala Menteri Datuk Seri Douglas Uggah Embas, maya ngulu Pengerami Armada Nembiak PBB Negeri di Dewan Suarah Samarahan, Kota Samarahan. -Gambar NADIM BOKHARI

Nangkan nya ku iya, PBB ulih nyadi siti jalai dalam ngemansangka nengeri Sarawak.

“Kitai deka ngengkahka menua Sarawak nengeri pemadu mansang ba taun 2030.

“Nya alai, mayuh chara kitai ngemansangka menua lebih agi nengah bala nembiak rebak baru sereta teknologi,” ku iya.

Ku Abang Johari, tu mih chara kitai laban lebuh kitai ngemanahka infrastruktur kitai, masa depan kitai deka lebih manah.

Nya alai, Abang Johari madah nembiak ti deka datai patut ngetanka nama-nama aja pekara ti mai pemaik ke Sarawak.

“Baka ti dipadahka niang Tok Nan, semina orang Sarawak aja ulih nyaga Sarawak enggau manah.

“Pemansang ti deka diasaika enda semina bepanggai ba aku siku, tang ba semua kitai,” ku iya nambah.

Rambau pengerami nya, urung lebih 2,000 iku mensia mayuh ari selampur menua Samarahan bisi datai sama berami.

Sama bisi ngulu pengerami nya Sapit Kepala Menteri Datuk Amar Douglas Uggah Embas, Ketuai Whip GPS Datuk Seri Fadillah Yusof, Ketuai Komiti Nembiak PBB Gerald Rentap Jabu, bala pengari rayat sereta ketuai PBB ke bukai.

Suara Sarawak