Terang ngagai anak bagi pekara betul enggau salah

SHAH ALAM: Sebedau tu mayuh ayan ba media rama dua iku nembiak ngaga ulah nunda Superman iya nya bepaut ba perabung kerita maya entukar nya bejalai.

Pekara nya chukup ngeruga nyawa nyadi ba Pasir Gudang, Johor lalu polis udah ngetan apai sereta nembiak nya dikena ngulihka penerang.

Ensana ayan baru ba media rama siku nembiak ngena gari sekula ngaga ulah nunda Superman tang serak tu ba atas motosikal ke dipasang siku lelaki dipelaba apai iya.

Endur empai ditemu tang gambar ke ayan nya nerima mayuh macham timbal ari raban penguna internet.

Penguna Facebook, Nora NoraJahad ngelalau apai indai patut nerang ngagai anak sida bekaul enggau pekara ke manah enggau jai maya umur sida agi biak.

“Kitai madah ngagai anak tumu maya sida agi biak, ni bagi ke salah, ni bagi ke betul.

Ila udah besai anak ngereja ulah ti ngelanggar undang-undang baru deka nganu,” ku iya madah ba palan komen.

Nangkan nya siku agi penguna Facebook, Ku Fazilah Ku Abdullah madah, anang kelalu nurutka peneka anak nyema pekara nya tau ngeruga nyawa sida.

“Nyawa enda ulih digantim seagi ulih diseliah, seliahka. Topi keludar pan enda dikena,” ku iya.

ULIH NGEMEDIS…Gaya ulah siku nembiak nepan motosikal nunda gaya Superman.

Suara Sarawak