“Rayat patut segulai sejalai ngemansangka Sarawak ngambika ulih nyadi nengeri maju sereta penuh integriti manggai taun 2030,”

KUCHING : Opis perintah enggau swasta patut ransing agi nerenak ulah integriti dalam opis sida.

Kepala Menteri Datuk Patinggi Abang Johari Tun Openg madah integriti siti pekara ti pemadu beguna ba pengidup mensia enda ngira bansa tauka pengarap.

“Ba pengidup sereta ba pengawa kereja, enti kitai deka meda kualiti siku-siku orang nya, kitai patut meda ari ulah orang nya.

“Rayat patut segulai sejalai ngemansangka Sarawak ngambika ulih nyadi nengeri maju sereta penuh integriti manggai taun 2030,” ku iya.

Abang Johari madah nya lebuh pengawa nutup Program Certified Intergrity Officer (CeIO) ba begunan Kaunsil Nengeri (Dun) lama, kemari.

Iya mega madah Sarawak nyadi nengeri keterubah ti bejalaika program tu.

“Sida ke gawa ba opis-opis perintah tauka swasta tu patut lurus penemu dalam bejalaika tanggungpengawa diri.

“Tu meh jalai sesiku orang nya ulih bejalaika pengidup tauka pengawa enggau nadai penanggul, lantang sereta nyamai,” ku iya nambah.

Ba taun nyin kemari, bala pengereja opis perintah nerima bonus sebulan setengah ketegal ari pemendar sida ngereja pengawa lalu nya endang patut diterima sida, ku iya.

Abang Johari mega madah Seksyen 17A Akta SPRM 2009 deka dipejalaika berengkah 1 Jun 2020 lalu semua agensi perintah tauka swasta patut bisi ngaga setipikit sebedau akta nya dipejalai.

Tuju CeIO tu ngambika orang ke gawa ulih nerenakka intergriti sereta asas moral awakka ulih mai pengelikun menua.

CeIO tu mega dikena nunjukka pemendar sereta komitmen perintah awakka ulih nempa mensia ti bisi intergriti.

Program tu beratika 44 iku pemesai ari mayuh bengkah opis menteri, opis mit, opis residen enggau daerah, badan berkanun enggau GLC mujur nerima setipikit penembu Program CeIO Siri 22 Bil. 2/2019.