Tiga lelaki nyauka bebadi nyawa

SARIKEI: Petara agi nyangkung seput tiga lelaki ba penusah bebadi entara sebuah lori enggau dua buah motosikal ba Jalai Bukit Sebangkoi, pagi tadi.

Sida tiga beumur entara 22 ngagai 53 taun nya benasip amat semina bakal mimit aja.

Berindik ari nya, Ketuai Opis Bomba Sarikei, Mahmudin Naruddin madahka raban bomba berumban ngesah ngagai endur penusah nyadi pengudah nerima kangau ngenyit urung pukul 7.30 pagi.

“Lebuh datai dia, kami meda bisi bekau minyak naya ba jalai ketegal penusah sebuah lori ti ngundan buah sawit belantak enggau dua buah motosikal,” ku iya lebuh dirandau.

Ku iya, penusah dipelaba nyadi lebuh lori nya tepawah sebedau ngelantak sebuah motosikal ba mua iya ti nengah jalai ke sama ngujungka lori nya lungkup.

“Sebuah agi motosikal ngelantak lori ari belakang laban enda teketuka motosikal iya.

“Kesemua sida ti bakal udah ditaban ngagai Sepital Sarikei ngambika diperubat.

“Berindik ari nya, kitai mega matau gaya jalai enggau meresi minyak ti naya nentuka pengelikun jalai ditengah entukar bukai,” ku iya nerang.

TEPAWAH… Gaya lori tungkup ba penusah bebadi di Jalai Bukit Semangkoi, pagi tadi.

Suara Sarawak