BINTULU: Jalai ngelawa genturung pendiau ba Batu 8, Jalai Bintulu-Miri ditu enda ulih ditengah ketegal ai Sungai Sepegang bah berindik ari ujan bangat kenyau ari demalam.
Tuai Rumah Banyang Ramai madah, bah nyadi urung pukul 2 dini hari tadi lebuh sida serumah benung jenak tinduk.
“Kami udah ngadang enti sema ujan bangat semalam-malam, jalai deka ampuh laban ai ari Sungai Sepegang lubah surut,” ku iya madah ngagai pemberita, tadi.
Genturung pendiau besemak bela tasah iya nya peranak Rumah Machan Maling, Rumah Francis Ikau engggau Rumah Banyang empu.
Nambah ke nya, sida Tuai Rumah Banyang serumah bisi 35 pintu, Rumah Francis Ikau bisi 22 pintu seraya 28 pintu ba Rumah Machan.
“Langgur dikena mutarka penusah ampuh bah tu udah diperambu perintah menua lalu udah dikerandau enggau Opis Pelilih Bintulu ti betuaika Opis Parit enggau Entali Ai,” ku iya.
Nitihka penerang, nadai penusah bebadi nyawa enggau rusak reta tengkira diripot ba penusah bah sekali tu.
Ku Tuai Rumah Banyang, sida serumah enggau peranak dua buah rumah bukai tepekul laban jalai enda ulih ditengah. Ai mega mupuk surut.







