BINTULU: Tiga buah rumah panjai ba Bagi Menua Bintulu diripotka tasah bah ketegal ujan bangat kena malam Hari Enam tu tadi.
Sekretariat Opis Penyangga Penusah Ngenyit Nengeri (JPBN) Sarawak, Mejar Ismail Mahedin madah, ujan bangat enda ngetu berengkah pukul 8 malam Hari Enam tu tadi ngujungka tikas ai niki pukul 11 malam.
Tang ku iya, maya matau endur nya tadi tikas ai diripotka udah mupuk surut.
“Berindik ari ujan bangat nya, peranak ba genturung pendiau nya napi penusah jalai enda ulih ditengah ngujungka sida ngerenchah ai bah nya ngagai jalai besai.
“Penusah bah tu ngasuh peranak irau laban ngerenchah arus sungai ti deras,” ku iya meri penerang, ditu tadi.
Ku Ismail, raban pematau begunaka awak 2 minit ngagai rumah panjai nya laban ngerenchah ai bah lebuh tama kia.
“Tikas ai agi enda tentu deras enggau dipeda majak surut.
“Tang, peranak dia irauka hari ujan baru ke tau ngasuh tikas ai majak niki,” terang iya.
Ku iya, peranak rumah panjai begunaka bantu pemakai ketegal jalai alun ngelawa endur nya enda ulih ditengah entukar.
