SRI AMAN: Tiga buah rumah panjai ba Kunsil Nengeri (DUN) Simanggang nerima agih belanja Projek Mit Pemansang Menua Pesisir (MRP) sepenyampau RM15,000 ungkup taun 2024.
Sapit Menteri Pelajar, Inovasyen Enggau Pemansang Penau, Datuk Francis Harden Hollis madah, pengawa meri agih belanja MRP nya dikena peranak rumah panjai nya bejalaika aktiviti enggau program beguna.
“Bantu tu diberi ngagai Komiti Pemansang enggau Pengelikun Genturung Pendiau (JKKK) Rumah Chau Sambau, Kampung San Ugol Asal sepenyampau RM5,000.
“JKKK Rumah Intai Kilau, Kampung San Ugol Atas enggau JKKK Rumah Grain Kom, Kampung San Munggor bela nerima agih belanja sepenyampau RM5,000,” ku iya.
Harden mansutka jaku nya rambau bejadi Program Pemansang Komuniti Kaunsil Pelilih Menua Sri Aman (MDSA) ba Rumah Chau Sambau, Kampung San Ugol Asal ditu kena 1 November tu tadi.
Sekeda program bisi diatur baka licha khas ari Opis Pengintu Pengelantang Mensia Mayuh Bagi Menua Sri Aman, Opis Veterinar Bagi Menua Sri Aman, Polis DiRaja Malaysia (PDRM) enggau MDSA.
Nya mungkur penerang pasal Kad Emas Kenyalang (KGC), licha orang nipu nengah online tauka scammer, licha pasal igi penyakit rabies enggau ti bukai.
ADUN Simanggang nya ngelalau semua orang bejalaika tanggungpengawa ngangau ejensi ti bekaul meri penerang ngagai peranak menua.
Ku iya, licha nya beguna amat ngagai peranak menua kelebih agi ba sukut pelajar enggau pengerai.
