Tikai: Macham bansa, mayuh guna

SRI AMAN: Kitai Iban ukai semina kaya enggau pengawa ngetan main asal enggau adat asal tang ngembuan mayuh pengelandik kelebih agi sida ti diau ba rumah panjai.

Pengelandik nengkebang tu suah ngayanka buah penemu ti mayuh kelimpah mandangka kitai chukup ngemeratka kelai penatai asal bansa ti ngemeranka iya.

Pengawa beranyam baka nganyam tikai endang suah dikereja kitai besehari sehari kelebih agi ba rumah panjai dikena ngisi awak pengudah lepa ari pengawa di tanah.

Tikai tu meri mayuh reti ba daya idup kitai bepelasarka utai ti dianyam kelimpah dikena ngemujurka sebarang pengawa ti begunaka tikai.

Nya alai, tikai ti dianyam tauka dipakan deka dianchau atas geladak tauka ba ruai endur kitai duduk enggau ngalika diri sereta dikena ngereja pengawa bukai.

ANGKUN… Sida ti angkunka pengawa beranyam tu patut ngajar rebak dudi ngambi bela landik beranyam tikai.

Bisi sekeda kandang menua nyebut tikai tu kelaya ti tau dilangup, digiling lalu bisi mega bansa tikai tau ditikal.

Pengelandik nganyam tikai tu suah dipeda kitai ba rumah panjai lalu penau tu tau dikumbai kitai pengelandik jari ti ditampung ari peturun aki ini kitai menya.

Tikai bisi macham bansa nitihka bansa utai ti dianyam sereta ngembuan mayuh guna lalu suah diberi nama dikena ngangkatka penama utai ti dianyam sida.

Pengelandik sida beranyamka tikai tu chukup nyelai sereta mayuh bansa utai dianyam nyadika tikai baka wi, bemban, senggang, bundung, kerupuk, akas enggau purun.

Nambahka nya, bisi sekeda leman ngaga tikai tu dikena entelah enggau nyilup tikai baka wi enggau danan, kelimpah ulih dikena nyilup kantung bumai baka takin, raga, chapan enggau lanji.

BEMBAN… Bansa tikai ti suah dianyam sida ke Indu kelimpah ngembuan mayuh guna.

Nya kebuah bansa Iban ngembuan mayuh bansa tikai nyengkaum bemban, wi, lampit, kelasah tauka dikumba bidai, tikai mengkuang tauka dikumbai bundung enggau tikai anyam bebuah sereta sidan ti dikumbai tikai burit.

Berindik ari nya, penau enggau pengelandik beranyam tu seruran dijaga enggau diturun ngagai anak, uchu enggau ichit wit ngambika enda midang ngapa diseruyut arus pemansang jeman.

Ngelansa sekeda bansa tikai enggau utai dikena ngaga sereta guna iya, Suara Sarawak nyidi enggau ngerintai bagi penerang sereta bekunsika sekeda penemu enggau bala pemacha.

Tikai bemban dianyam ari kulit batang bemban ti dilit lalu dianchau endur sida ba rumah panjai duduk berandau enggau tinduk.

Kitai mega bisi tikai dianyam ari bila wi tauka rutan ti suah agi dianchau enti bisi temuai datai, bidang besai agi ari tikai bemban.

TIKAI BURIT… Tikai tu suah dikena sida ke lelaki nurun ngabang, dsangking ari belakang iku sirat.

Tikai lampit mega dianyam ari wi tang bila tebal agi sereta disilup ngena bila wi empu seraya tikai kelasah suah ditimang tauka disebut dalam leka main.

Tikai kelasah tu dianyam ari bila wi ti dibelah kasar lambar lsereta bebidang besai, besai ari tikai lampit.

Nangkan nya, kitai bisi tikai mengkuang dianyam ari daun mengkuang ti udah dipanduk ngambi betali burak sereta tan, enda mudah retai lalu daun nya dibelah alus.

Pia mega tikai panchar bebilaka daun mengkuang ti dipanduk belambar lalu bila iya dijalih enggau mayuh chura enselup.

Kitai bansa mega ngembuan penemu enggau pengelandik nganyam tikai anyam bebuah ti dianyam ari bila bemban enggau wi, ti dibelah alus sereta dianyam ngangkatka buah tauka ukir.

Bansa tikai tu dianchau lebuh kitai bisi nirika gawai besai, pengerami makai selamat, pengerami melah pinang enggau ke bukai ti nerima penatai bala pengabang nyengkaum ari Panggau Libau.

Sebansa agi tikai ti nyelai sereta jarang dipeda diatu iya nya tikai burit tauka dikumbai kitai tikai pemadu mit semina sengkeman burit duduk aja lebuh berandau ba ruai.

Tikai bansa tu dianyam bebuah ngena bila wi, endur sida ke lelaki nyelap burit maya duduk.

Nampung jerita tuai kelia, sida ke lelaki suah mai tikai tu lebuh ngabang ngagai rumah orang ngambi ulih duduk sebarang alai lalu tikai burit disangking ari belakang iku sirat lebuh nurun ngabang.

Lansa pasal idas tauka bidai iya nya tikai pemadu besai ti ulih dianchau mungkur sepiak ruai lalu idas tu mega dianyam ari bila wi.

Wi nya dibelah kasar lalu dipakan enggau tali temeran tauka dikumbai kitai kulit tekalung lalu sida ti bumai suah ngena idas tu ngerangkai tauka nyembi padi tauka buah lada.

Tikai perampan tu tau dikumbai kitai tikai betampung dianyam ari kerupak senggang bebila kasar lalu dikena nyembi padi, lada, engkabang tauka utai bukai.

Udah nya kitai ngelansa pasal tikai kerupuk ti dianyam ari daun kerupuk sereta bebila kasar, suah dianchau ba dapur, dikena duduk betunga makai. Mayuh agi bansa tikai bukai nyengkaum tikai perau, purun, belebak, empeda ti ngembuan macham guna.

Tikai perau iya nya tikai belebak dianyam dua, dikelulu nyadi perau endur sida manang belian, tikai purun dianyam ari batang purun paya ti bebatang kasar enggau tikai belebak tu enda besai lalu enda betampung tang ari bemban, tikai tu ditampung ngambi besai buka seraya tikai empeda dianyam ari empeda tauka linti bemban.

Kitai bansa Iban mega ngembuan mayuh ukir diangkat ba tikai ngambika manding dipeda lalu deka mandangka pengelandik sida ti beranyam.

Sekeda ari buah tikai suah dipeda baka bangkit, enseluai, lingkuk, rambing, ulat entadu, tudung lung, mulung merangau, tungku, kara jangkit, penganan, pipit nepan, tangkai rembai enggau dulang sempandai.

Buah anyam bukai ti mar agi dianyam baka kulit remaung, tumbit remaung, buah angkung, dulang kumang, panggal laut, batik sirung, matahari, nabau, kenyalang, mata puna, angkung, naga, atur sidan enggau ke bukai.

Ari tusui sida ke tuai, orang ti deka nganyam tikai patut bisi peneleba lalu patut dipiring ngambi enda alah bulu, alah ayu.

Orang tuai bepeneleba beranyam suah madahka ni bagi bansa buah tikai ti bisa enggau enda bias nyengkaum buah tikai ti enda tau dianyam sengapa.

Sida patut nganyam bepelasarka utai empa jelu ti nyadika buah dianyam ngambika enda alah semengat.

Suah mega sida ke indu beranyam tu patut ngembuan pengeliat ati, puh ngereja pengawa ngambika enda alah ayu ketegal buah anyam.

Nambahka nya, sida ti nganyam patut nitihka renggat tauka ripih kelimpah landik nganyam mayuh bansa buah anyam.

Nya kebuah, sida ti beranyam tu endang ngembuan pengelandik ke pemadu nyelai sereta patut dikemegah.

Kelimpah ari nya, pengawa beranyam tu patut diajar ngambi sama landik nengkebang buah anyam kelimpah ngembuan mayuh guna ba pengidup kitai besehari-sehari.

Bala rebak baru patut belajarka chara nganyam ngambi pengelandik peturun kitai enda midang ngapa diserunyut arus pemansang dunya.