Tinggal 32 kluster, empat udah punas kemari

KUCHING: Opis Pengerai Nengeri Sarawak kemari ngenukuka empat kluster punas pengudah 28 hari nadai ngerikodka sebarang kes baru positif Covid-19.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka kluster ti punas tu iya nya Kluster Rakut di Miri, Kluster Seruas di
Beluru, Kluster Kejatau di Sri Aman enggau Kluster Jan Yong di Kapit.

“Nya ngujungka kluster ti agi ngerekai ba Sarawak semina tinggal 32 kluster.

“Ari 32 kluster ti agi ngerekai tu, lapan kluster bisi nambah sehari tu (nambah kemari), ke alai 24 kluster ti bukai enda berubah,” ku iya dalam Aum Media Covid-19 di Dun Lama ditu, kemari.

Berebak enggau nya, Uggah madahka Pelilih Menua Tatau enggau Pusa pulai bebeli ngagai status gadung kemari pengudah nadai ngerikodka kes bermpit dalam timpuh 14 hari.

“Nya ngujungka, pelilih menua ba status gadung di menua tu bisi lapan buah.

“Kelimpah ari nya, Pelilih Menua Song mega pulai ngagai status oren ari status mirah pengudah semina ngerikodka 35 kes dalam timpuh 45 hari.

“Nya ngujungka pelilih menua ba status oren bisi tiga buah,” ku iya.

Suara Sarawak