KUCHING: Niang Puan Sri Datin Amar Lim Su Kheng, indai Sapit Premier, Datuk Amar Dr. Sim Kui Hian, dikenang siku tokoh indu angkun gawa ti mereti ke jasa enggau pemanah pengawa bala ti gawa ke komuniti.
Berindik ari nya, Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi sereta sida sebilik meri penyinu ati ngagai Dr. Sim sebilik ti udah ditinggalka indai midang, ensanus.
“Niang ukai semina bini ex-Sapit Kepala Menteri, Tan Sri Datuk Amar Sim Kheng Hong aja, tang siku tokoh indu ti kala gawa ba Gempung Pengasih Bala Bini Menteri Sarawak (SABATI).
“Niang mega gawa ke pemansang ba Parti Sa’ati Rayat Sarawak (SUPP), sereta mayuh gerempung ukai dikuasa perintah (NGO),” ku iya nengah pesan ba Facebook rasmi, kemari.
Berebak enggau nya, Tun Wan Junaidi enggau Toh Puan Fauziah besampika semua kaban belayan niang diberi pengeliat ati, pengering enggau pengelantang napi penguji besai nya, lalu terus bulih inspirasi ari legasi pemanah niang.
