BINTULU: Tourism Malaysia ransing ngelaku sektor dagang temuai enggau budaya menua nengah ngatur Pengerami Ngintu Taun Baru China 2026 ba Padang Bilun Bintulu kena Hari Dua.
Program ti diatur ari pukul 10 pagi nyentuk 1 tengah hari nya ukai semina ngintu pengerami, tang mega nyadi pelasar strategik ngemujur kimpin Taun Nemuai Ke Malaysia 2026 (VM2026) enggau nyagu penyelai pesaka budaya Malaysia ngagai temuai ti datai ba bagi menua tu.
Penatai temuai ari menua tu enggau menua luar diambat enggau richah, mandang pengelebih Malaysia nyadi palan dagang temuai ti ngelantang ati sereta kaya enggau bemacham budaya.
Pengawa dipun enggau simbolik ngirau Yee Sang ti mandangka penyerakup enggau pengelantang nipak juluk VM2026 dikena narak semangat begulai entara rayat pupu bansa sereta komuniti temuai.
Pemerindang tanda singa ba balai penatai mega narit ati seraya mandangka elemen seni enggau tradisyen komuniti Tionghua ngagai temuai ti baru datai.
Bisi mega pemandang pekayan asal Malaysia ngambi meri peluang ngagai bala temuai ngelala bemacham pekayan asal etnik ba menua tu lalu ngelaku Malaysia nyadi palan dagang temuai budaya.
Maskot rasmi Visit Malaysia 2026, Wira enggau Manja mega narit ati besuluka jaku pengerami lalu nyadi pematak interaktif lebuh bala temuai ngena peluang begambar ungkup kenang.
Penatai sekeda penerebai ari Kuala Lumpur enggau Kuching muak ke pagi diambat enggau richah, mandangka komitmen meri peneleba enggau kenang manis ngagai temuai ti datai ba Bintulu.
Pengawa ngatur program baka tu nunjukka pengeran Tourism Malaysia negap dagang temuai bepelasarka budaya sereta ngentapka penuduk Malaysia nyadi palan dipilih nyerumba VM2026.
– EDISI UKAS
