BETONG: ‘Penemu enggau Pemandai Lanting Pengidup’ pia ku rambai jaku dikena bejadika Wang Turu Pemansang Pelajar (TPP) Rumah Jambai Kerapa Spak, ditu.
Sekretari iya, Jilian Kawan madah tuju numbuhka TPP dikena ngangkatka tikas pelajar sekula sereta nambahka penemu enggau penatai pemisi ruang bilik.
“Kami numbuhka TPP tu ngambika ulih nempa nembiak ti bekualiti sereta likun dalam pendiau pengidup.
“Pia mega juluk kami deka ngadaka nembiak ti nyulut ba pengawa lumba enggau main.
“Kelimpah nya, deka ngangkatka nembiak lebih agi peranak Rumah Jambai ngambika ngembuan pengelandik jari,” ku iya rambau Pengerami Bejadika TPP diatur ba Rumah Jambai Kerapa Spak, udah mujur dipenyadi kena 2 June tu tadi.
Nangkan nya, Jilian madah TPP ditumbuh kenyau ari taun 2018 diberi ungkup nembiak ke nyenggala nyulut lalu dikena meransang bala nembiak bukai.
Nitih penerang, TPP bisi nyendiaka insentif pelajar ngagai nembiak ke nyulut ba peresa baka UPSR (3A) diberi RM50, PT3 (4A) mega diberi RM50, SPM/SPMV (4A) diberi RM70 lalu ba tikas SPTM/ Matrikulasi (CGPA 2.7) diberi RM100.
Udah nya, insentif ungkup nembiak ke mujur nampung pelajar ngagai renggat ke tinggi baka Diploma diberi (RM150), Degree (RM200) enggau Master PHD (RM500).
Enda tinggal mega, raban nembiak ke mujur ba pengawa lumba, main tauka pekit ba renggat nasional sida deka diberi insentif RM50.
Ba pengerami bejadika TPP tu tadi bisi tujuh iku nerima insentif pelajar.
Penyampau TPP Rumah Jambai asil ari pemeri tauka sukung peranak rumah panjai naka tu iya nya RM2484.
Sama bisi datai Chairman TPP Mathew Igoh Lingkong, Tuai Rumah Jambai, bala komiti TPP, peranak rumah panjai enggau bala penerima TPP ungkup renggat keterubah.
