Transformasyen SDNU ukai semina fokus pekara main asal

KUCHING : Transformasyen SDNU nitihka singkang penemu baru ukai semina fokus ngemeranka main asal aja.
Sapit Presiden baru SDNU, Dr Johnical Rayong Ngipa madah diatu kitai begulai dalam siti tim dalam SDNU dikena ngemansangka bansa Dayak.

“Kitai deka ransing agi meransang Dayak awakka terus mujur ba bidang pelajar, ekonomi enggau pemansang bukai kelimpah besaup enggau perintah ngemansangka pengidup rayat lebih agi ba menua pesisir.

“Pia mega, aku meri terima kasih ngagai semua delegit ke udah meri mandat ngujungka aku dipadu nyadi sapit presiden ke baru,” ku iya.

Kaban Kunsil Nengeri (ADUN) Engkilili nya madah munyi nya ngagai Suara Sarawak lebuh dipinta meri timbal bekaul enggau pemujur iya dipilih nyadi sapit presiden baru SDNU apin lama ke udah.

Berebak enggau nya, Dr Rayong meransang semua kaban SDNU gawa dalam siti tim begulai enggau iya meri suung penuh ngagai Presiden SDNU Tan Sri William Mawan Ikom ngemudi visyen enggau misyen gerempung tu.

Ba pengawa bepilih TGA Ke-35 SDNU ungkup 2019-2021 dia Dr Rayong menang ngalahka ex-Komander Soldadu Darat Lt General Datuk Stephen Mundaw ungkup penuduk sapit presiden.

TGA SDNU apin lama ke udah bisi ngatur pengerami Makai Taun dikena ngintu 63 taun penumbuh gerempung tu lalu dipenyadi Kepala Menteri Datuk Patinggi Abang Johari Tun Openg.

DR JOHNICAL RAYONG