Tuah Taha ba lagu ‘Berdiri Seorang Perindu’

SARIKEI: Lagu Berdiri Seorang Perindu disada Ibnor Riza mai tuah ngagai Taha Ariffin pengudah dipadu menggi gelar champion ba Pekit Karaoke Keterubah diatur Serakup Dayak Sarawak (Pedas) Sarikei.

Ku Ketuai Pemadah iya, Aldrich, pekit tu sebagi ari aktiviti sida ungkup taun 2019 seraya ngiga belanja ke serakup nya.

“Kami chukup lantang ati meda pemanah timbal diterima ari penyampau tubuh bala ti rejister enggau bepekit taja jaku tesau semina ditibar nengah media rama baka whatsapp enggau Facebook.

“Serak keterubah tu kami nerima 17 penyereta ke alai renggat bepilih diatur Hari Lima ba Rumah Asap Nyelong ditu seraya renggat kepenudi diatur enggau naka pengerichah lemai Hari Enam.

“Nasip endar bala ke datai meri sukung enggau kerejasama nentuka pekit lanchar sereta mujur,” ku Aldrich lebuh dirandau Suara Sarawak.

Nya alai sida sebuat ke nyadi piak ngatur minta ampun enti sema bisi penimpang ba atur pekit laban tu keterubah lalu sida deka belajar ari semua utai ke udah nyadi.

“Terima kasih ke sukung semua laban pemujur pekit tu asil ari kerejasama rat ari kita,” tandu iya.

Ngelansa pasal pekit nya, Taha ke menggi gelar champion ngalahka tujuh pemekit kepenudi bukai pulai mai trofi enggau perais mata duit penyampau RM100.

Ba penuduk lumur Kennedy Dingin ti nyadaka lagu Dara ari Andrewson Ngalai nerima trofi enggau RM70 besemaya deka ngujika nasip ba pekit ke bukai.

Jhancasila Juntan mai lagu Pengerindu Betuchik Laman ari Winnie Albert ngempu penuduk ketiga nerima trofi enggau RM50.

LANDIK BELAGU… Taha nerima trofi ari piak pengatur pengudah menggi gelar champion Pekit Karaoke Pedas Sarikei.

Suara Sarawak