SARIKEI: Tuai Rumah kelebih agi ba sitak Sarikei dipinta bejalaika tanggungpengawa ti dilempai enggau manah sereta lurus ati.
Sapit Menteri Pengeraja Asal, Rampa Menua enggau Ubah Klimet, Datuk Seri Huang Tiong Sii madah, tanggungpengawa sida beguna amat dikena ngemansang rumah panjai.
Ku iya, tuai komuniti nya mega meseti ngesan tanggungpengawa nyadi jematan entara rayat enggau ejensi perintah.
“Nya kebuah, aku ngelalau semua peranak rumah panjai seati lalu bekerejasama enggau Perintah Sarawak nadai ngira penemu politik dikena ngemansang Sarikei,” terang iya.
Huang mansutka jaku nya nengah ripot berita Unit Komunikasyen Perintah Sarawak (UKAS) lebuh bejadi Program Abas UKAS, Ngabang Gawai di Balai Jalai Langsat Sarikei, Hari Lima tu tadi.
Ngelansa pasal program nya, iya madahka nya sebagi ari pelasar pemadu manah dikena ngenyemak tuai enggau rayat.
