SRI AMAN: Projek SMART Padi Paya Bedandang Besai (SMART SBB) ba Batang Lupar diselinting ulih nyapai asil nyentuk tujuh tan padi sehektar kelimpah mantu nambah tikas sara siri (SSR) berau kelebih agi ungkup nangkup peminta Sarawak.

Menteri Betanam Betupi enggau Jamin Bekal Pemakai, Mohamad Sabu muji penyulut pemadu baru projek nya ti mujur nambah asil padi ngagai 5.5 tan sehektar enti dibanding 2.8 tan sebedau tu.

“Umai ditu ngaul genturung 105 hektar pemesai, tu siti genturung ti besai alai nanam padi lalu kitai meda asil padi nambah ari 2.8 tan ngagai 5.5 tan sehektar, tu siti penyulut ti ngemantup ati.

“Aku ngarap dudi hari, pengawa ngeluar padi tu ulih manggai tujuh tan sehektar kelimpah mantu nampung SSR kelebih agi ungkup Sarawak dulu,” ku iya.

Mohamad bejaku munyi nya ba aum pemberita pengudah bejadi Program Gelumbang Padi Sarawak: SMART Padi Bedandang Besai (SMART SBB) sereta Hari Ngundang Penguna IADA Batang Lupar 2026 ba Balai Sri Nangkai, Gran Stumbin ditu, kemari.

Program SMART SBB di Sarawak diatur IADA Batang Lupar nengah kerejasama strategik Padiberas Nasional Berhad (BERNAS) sereta Advansia (Sarawak) SDN. Bhd. Bepelasarka rikod, projek nya ngerikod asil nambah belipat ba musin kedua 2023 lebuh ngasilka padi 5.5 tan sehektar enti dibanding semina 2.8 tan sebedau ngena kereban moden nya.

Ngelansa pasal isu meli berau ketegal pengirau, Mohamad meri jamin bekal berau menua chukup abis nadai nyentuk ujung taun tu.

“Aku nyebut nyemetak, bekal berau kitai insya-Allah chukup lalu abis nadai nyentuk ujung taun tu nitih rega kemaya hari,” ku iya.

Nya alai, iya ngelalau mensia mayuh enda ngaga pengawa meli irau ti ulih ngeruga penegap makit.

“Enti ngelama tu kitai semina begunaka dua kambut berau, kitai patut meli dua kam but aja lalu enda ibuh meli kelalu mayuh.

“Pengawa baban meli barang tu ulih ngeruga bekal berau ba makit sereta meri peluang ngagai sekeda raban beambi ulih nikika rega berau,” ku iya nyemetak.