INDUN SILONG
Suarasarawak.news@gmail.com
KUCHING: Premier Sarawak, Datuk Patinggi Tan Sri Abang Johari Tun Openg meri basa ngagai Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar laban iya dikelala nyadi siku tuai ti ngembuan integriti enggau kredibiliti besai.
Iya madah, Tun Wan Junaidi mega siku tuai Sarawak ti chakah ngemansang nengeri tu enggau pengelantang rayat.
“Sepanjai iya gawa nyadi pengemeran undang-undang, kaban politik, menteri sereta nyadi TYT Sarawak, iya seruran mandang penemu ti nyelai, pemaruh ati enggau penyiru.
“Nya alai, bup nya ukai semina dokumentasyen pengawa enggau pemujur iya tang tu mega mantai ulah iya nyadi tuai, pengeliat ati sereta semangat patriotisma ti patut meri inspirasyen ngagai rebak diatu enggau dudi hari,” ku iya.
Abang Johari bejaku munyi nya rambau program ngelancharka dua buah bup nya Pejuang Sejati: Dari Rimba Ke Astana enggau 365 Hari di Astana: Cherita enggau Gambar TYT Tun Pehin Sri Dr Haji Wan Junaidi Tuanku Jaafar ti diatur ba Balai Santapan, Kunsil Nengeri Sarawak ditu, malam tadi.
Ku iya, pengelurus ati enggau pengeransing Tun Wan Junaidi ba pengawa ngemansang pengelantang enggau hak Sarawak nempa legasi ti enda ulih dibeli ti meruan dikeingat rebak dudi.
