KUCHING: Yang di-Pertua Negeri Sarawak ,Tun Pehin Sri Dr Wan Junaidi Tuanku Jaafar, sereta bini, Toh Puan Fauziah Mohd Sanusi, nerima penemuai basa ari deligit senatorenggau ex-senator ba Astana Negeri Sarawak seharitu tadi.
Sida ke datai tu, Senator Datuk Ahmad Ibrahim, Senator Susan Chemerai Anding, Senator Michael Mujah Lihan, Senator Robert Lau Hui Yew, Senator Pele Peter Tinggom, Senator Rita Sarimah Patrick Insol sereta Ex-Senator, Datuk Dr Zaiedi Suhaili, enggau Datuk Paul Igai.
Nitihka penerang ari Ahmad, penemuai basa nya ngembuan tuju deka minta penemu ti berega ari Tun Wan Junaidi senentang kuing tuju Dewan Negara.
“Penemu Tun Pehin Sri Dr Wan Junaidi chukup manah lalu naka ke diatu iya udah meri penemu ti berega ngagai kuing pemansang Dewan Negara.
“Ketegal nya kami mai bala senator ke diatu (Sarawak) datai ngatur penemuai basa tu,” ku iya.
Iya madah munyi nya maya dirandau media sepengudah penemuai basa nya.
