Udah 34 taun idup begulai enggau sebayan

KUCHING: Pemansang ti dikeandal enti beridup ba mengeri semina ngasuh asa lalu tau dikumbai cherita tempa aja.

Kebuah pia laban sekeda ruang bilik nadai jalai bukai kelimpah ngentak rumah ba tanah pendam lalu idup begulai enggau sebayan dia.

Ba sebengkah penerang dibantaika Kepala Suruhanjaya Hak Asasi Manusia (Suhakam) Sarawak, Dr Madeline Berma nengah akaun Facebook iya kemari madahka diri bisi dipadah pasal penanggul ditapi sida dia.

Nitih ku Madeline, sekeda ruang bilik udah lama diau ba tanah pendam lama Iban di tengah mengeri Kuching ditu ketegal napi pemar berumah enggau nadai tanah.

“Aku lalu beguai ngesah sida kin urung pukul 6.30 lemai disempulang dua kaban NGO ti sama deka nemu nama pekara ti nyadi.

BEKUNSI ENGGAU SEBAYAN… Rumah didirika ba tanah pendam.

“Datai dia, kami meda pendam magang besemak enggau genturung pendiau nya,” ku iya.

Ku iya, sida sebuat lalu ngelawa sereta ngerandau siku ari peranak ti udah diau dia manggai 34 taun.

“Sida tu entara orang pemadu tumu angkat mindah ari menua pesisir ke mengeri Kuching.

“Lebuh dirandau kebuah sida diau ba genturung pendam, dia siku indu nyaut kami enggau saut ti chukup sinu.

“Ku indu nya, tu aja mih tanah ulih alai kami menyanak diau, beridup begulai enggau bala kaban ke udah nadai,” ku Madeline nusi baru jaku indu ke dirandau sida nya.

BANTU MIH KAMI… Madeline begulai enggau dua iku indu ti udah lama ngentapka diri begulai enggau sida sebilik ba tanah pendam.

“Sida nya mindah ke mengeri laban deka ngulihka pengidup ti menyana agi, ngandalka diri ulih pansut ari perekuh penyeranta.

“Taja pia, baka tu utai ti dikumbai kitai pemansang?,” ku iya madah nyemetak mantaika pengasa diri.

Ngelansa berita dikeluar Suara Sarawak kena 14 Julai tu tadi, Gerempung Bansa Dayak Sarawak (SDNU) madah sida deka ngaul kerejasama Gerempung Ketuai Raban Bansa Enggau Tuai Rumah Bansa Iban Bagi Menua Kuching (Pemaik) mutarka penanggul setinggan, sida ti berumah lalu diau ba tanah pendam SDNU ditu.

Presiden iya, Tan Sri William Mawan Ikom madahka SDNU deka nganjung diligit berandau enggau raban Pemaik enda lama agi ngambi ulih berundingka chara mutarka penanggul tu.

Dulu ari nya, Uggah mega minta Pemaik ti diketuai Temenggong Datuk Bernard Agan mantu ngempung penerang penyampau tubuh rayat seranta nentuka perintah ulih mantu ngelempungka tating penusah ditapi sida.

Ku Uggah, enti penerang udah digempung lalu Pemaik enggau Perintah Sarawak ulih berundingka chara mutar enggau ngelangkar program bantu ari perintah.