KUCHING: Universiti Teknologi MARA (UiTM) Pampang Sarawak ngembuan juluk deka nyadi palan pelajar tinggi tebilang ba renggat antarabansa.
Rektor UiTM Sarawak, Prof Datuk Dr Jamil Hamali madah, penyulut ba pelajar sereta pansik nyadi pekara besai dikemerat UiTM Sarawak lalu palan pelajar tinggi nya ransing ngempu penuduk keterubah ba pekara pelajar enggau pansik ti inovatif.
Ku iya, palan pelajar nya chakah nempa graduet ukai semina ngembuan penemu tang bela bisi pengelandik bekaul mensia sereta ulih meri empas manah ngagai industri enggau komuniti.
“Tu mai reti UiTM Pampang Sarawak ngembuan juluk deka diaku ba renggat antarabansa ungkup program akademik, pansik enggau kerejasama.
“Mayuh palan pelajar tinggi ba serata dunya nyengkaum UiTM ngemeratka pemeruan sekali ke ari sukut pemeruan rampa menua tauka nentu institusyen seruran engkeman sereta ulih nelebaka diri enggau ubah dunya,” ku iya.
Dr Jamil mansutka jaku nya rambau Pengerami Makai Lemai serimbai Pengerami Ngintu Genap Taun Ke-50 UiTM Pampang Sarawak ti dipenyadi Premier Sarawak, Datuk Patinggi Tan Sri Abang Johari Tun Openg ba Palan Konvensyen Borneo Kuching (BCCK) ditu, malam ensanus.
Ku iya, berengkah ari taun 2020 nyentuk ke diatu, UiTM Pampang Sarawak udah nyain 46 Sempekat Pemereti Ati (MoU) sereta Sempekat MoA enggau bakih industri, palan pelajar tinggi enggau kolej ba menua tu enggau menua luar.
“Taun tu, bisi 18 MoU, MoA sereta LOL (Letter of Intent) disain enggau 11 palan pelajar tinggi sereta kolej ba Indonesia, dua ba Amerika Syarikat lalu siti di Itali, Austria, Singapore enggau China,” ku iya.
