Ukum RM10,000 siku, ‘upah’ ngelanggar PKPB

KAPIT: Lapan iku lelaki diukum RM10,000 siku laban ditemu nyabung manuk enggau ngelanggar Atur Mindah Betagang Belebas (PKPB) kena Hari Minggu tu tadi.

Ketuai Polis Pelilih Kapit, DSP Freddy Bian madahka seraban polis ari Opis Pansik Penyalah (JSJ) Kapit udah bejalaika operasyen nya.

Ku iya, sida bejalaika operasyen urung pukul 2.45 lemai ba kelang belakang sebuah rumah di Taman Country Height pengudah nerima penerang pasal pengawa nyabung manuk nya.

“Ba operasyen nya, raban JSJ Kapit mujur nangkap lapan iku lelaki beumur entara 45 ngagai 54 taun.

“Sida mega mujur ngerampas 10 iku manuk sabung idup, tujuh iku manuk sabung udah mati enggau dachin,” terang Freddy.

Ku iya, semua saspek dibai ngagai balai polis ngambi mantu pengawa mansik nengah Seksyen 3(1) Langkah-Langkah Pencegahan dan Penganiayaan Terhadap Binatang 1963.

Iya mega madahka genap saspek dikompaun RM10,000 laban ngereja penyalah di baruh Peraturan 9 Pencegahan dan Pengendalian Penyakit Berjangkit (Langkah-langkah Dalam Jangkitan Kawasan Tempatan) Peraturan 2020.

Suara Sarawak