Ulah bebasa kunchi pengelantang rayat Sarawak

Rayat di nengeri tu chukup betuah laban ngembuan penemu sereta ulah ti bela bebasaka pangan diri

INFO

100 taun kelia Sarawak bisi bemunsuh entara sekeda bansa tang penyarut nya udah jauh belinsur lalu nadai agi nyadi.

KUCHING: Ulah bebasa entara rayat Sarawak nyadi kunchi pemujur pengiudp enggau pengelantang rayat pupu bansa di nengeri tu.

Tuai Pemegai Menua, (TYT) Tun Tun Abdul Taib Mahmud madah rayat di nengeri tu chukup betuah laban ngembuan penemu sereta ulah ti bela bebasaka pangan diri.

“Sarawak nyelai laban nadai raban bansa ti majoriti lalu semua bansa ngemeranka ulah bebakih enggau beserakup enggau pangan diri,” ku iya.

Iya madah munyi nya rambau Pengerami Bejadika Sarawak’s Pride Project Maze bepalan ba Waterfront Kuching, kemari.

Tandu iya, 100 taun kelia Sarawak bisi bemunsuh entara sekeda bansa tang penyarut nya udah jauh belinsur lalu nadai agi nyadi.

Taib ngasaika Sarawak mega nyelai laban rayat bela bebasaka penatai, adat enggau pengarap pangan diri.

“Kitai ngembuan kaul ke manah kenyau ari kelia laban ulah ti bela bebasaka pangan diri.

“Kitai nerima bida ke bisi entara komuniti,” ku tandu iya.

Iya madah, Sarawak suah dikelala nyadi chuan penyerakup enggau pengelantang rama lalu diangkat nengah projek Sarawak Pride.

“Sarawak dipeda meruan taja terubah iya kitai bisi nangi ketegal takah pemansang ba mengeri enggau menua pesisir.

“Tu mih cherima pemansang enggau pengaga ke deka dipeda ba rayat di nengeri tu iya nya seruran bebasaka pangan diri,” ku iya.

Iya ngarapka rayat Sarawak terus ingatka pemanah kaul baka ke diasaika sehari tu.

“Kitai deka terus ngemeranka pemanah kaul, pengelantang rama laban nya pemun ke ditempa ungkup Sarawak,” ku iya.

Ku iya, beratika sigi bisi penemu ke leluba dituduh ngagai nengeri tu tang nya agi mit lalu enti kitai mujur dia kitai ulih ngalahka penemu-penemu ti mit nya.

“Chara pemadu manah terus nyingkang ke mua beserakup enggau manah kaul enggau pangan diri ditu,” ku Taib.