SARATOK: Jematan Sungai Krian dipelaba dibuka ngagai mensia mayuh sebedau pengerami Hari Raya Aidilfitri, bulan March tu.
Sapit Premier Sarawak, Datuk Amar Douglas Uggah Embas ngarapka gaya hari semampai manah nentuka lima peratus kereja projek ti agi tinggal ulih digaga nitih taga.
“Kitai ngarap gaya hari deka majak manah ba timpuh sebulan tu laban kitai nyelinting nembu ke Jematan Sungai Krian sebedau Hari Raya Aidilfitri.
“Sebedau Syawal, jematan tu ulih ditengah mensia mayuh,” ku iya ngagai pemberita pengudah bejadi pengawa nyambung renggat kepenudi struktur Jematan Sungai Krian ditu, kemari.
Ke penerang, projek Jematan Sungai Krian ti beungkus RM112,499,580.09 udah manggai 95 peratus lalu ditaga dibuka ngagai mensia mayuh kena 15 March 2026.
Jematan Sungai Krian ngaul penyampau semua alignment sepemanjai 1.227 kilometer, ti disambung terus ngagai Projek Jalai Tebing Tasik Pakej A5 nuju Roban.
Menteri Infrastruktur enggau Pemansang Palan Penyangkai Kapal nya madah, jematan nya digaga EPR (Kuching) Sdn. Bhd ti belabuh kena 25 March 2019 dikena nyendia jalai alternatif ti strategik kelimpah ari Jalai Besai Pan Borneo.
“Jalai tu deka ngurangka kitai bepanggai ba servis feri ti udah nyadi penyambung besai ba sitak nya.
“Nengah penembu jematan tu, timpuh pejalai ngena feri nya urung 15 minit dipelaba pandak agi ngagai semina urung seminit aja,” ku iya.
Uggah mega meri terima kasih ngagai Opis Kereja Raya (JKR) Sarawak, konsultan (Opus Consultans), kunteriktor, peranak menua enggau pengari rayat ti udah nyaup ngemujur pengawa ngaga jematan nya.
“Nengah kerejasama semua, kitai ulih ngasai siti da infrastruktur penyambung ti besai reti,” ku iya.
