Undang-undang jalai kepenudi ngajar Petronas

KUCHING: Perintah Sarawak udah sedia deka bejalaika atur undang-undang ngagai Petronas bekaul enggau chukai lima peratus ti bedau dibayar.

Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali madahka pekara tu ila deka dipejalai nengah Ordinan Chukai Jualan.

“Baka udah dipadah Kepala Menteri Datuk Patinggi Abang Johari Tun Openg lebuh macha Bajet Sarawak 2020 kena 4 November tu tadi, Petronas nyentuk diatu lalu bedau mayar chukai lima peratus baka ti disempekat sebedau tu.

“Ba jaku Kepala Menteri mega, perintah nyemetak madah deka bejalaika atur undang-undang dikena mutarka pekara tu,” ku iya.

Sharifah Hasidah mega ngaku diri asa ati meda ulah piak Petronas lalu enti sema Petronas mayar chukai lima peratus kandang beberapa hari deka datai, sida enda neruska pejalai undang-undang nya.

Sharifah Hasidah madahka pekara tu ba aum pemberita beserimbai enggau Aum Kedua Renggat Keempat Dun Ke-18 ditu tadi.