KUCHING: Pemutus Kort Tinggi Kuching ngansak perintah enggau Komiti Besai Pengawa Bepilih (SPR) ngaduka pengawa bejalaika Undi18 ujung taun tu endang patut.
Kaban Parlimen Selangau, Baru Bian lantang ati enggau pemutus kort nya ngambi rayat Malaysia beumur 18 taun ngundi maya pengawa bepilih lalu enda ibuh nganti umur manggai umur 21 taun.
Ku iya, pemutus nya engkeman digaga ba maya ke patut kelebih agi perintah Perikatan Nasional (PN) ke diatu ngaga bemacham dalih nangguh atur Undi18.
“Udah kelalu lama perintah menua kitai betuaika raban politik ti sama lalu udah mega megai pangku pengawa nya betaun-taun pengelama.
“Ari nya tadi, runding enggau ulah sida tu jauh tinggal lalu sekeda penemu sida nyau enda ngakun agi diterima rebak baru ba jeman diatu.
“Nya alai ba runding aku, udah datai ba maya enggau umbas endur kitai ngelempaika pengandal ngagai rebak biak mantaika sada enggau utai dikedeka sida.
“Tu nipakka pengarap aku ngagai sebuah Malaysia baru ke alai semua rayat menua tu deka bisi hak sebaka nadai ngira umur, bansa enggau jalai pengarap.
“Besai pengandal aku ngagai raban nembiak nampung pengawa nyadi tuai nuju menua maju,” ku Baru ba sebengkah penerang nengah Facebook rasmi iya, tadi.
Adun Ba’Kelalan nya madah, lebuh Konstitusyen diubah ngambi rayat Malaysia beumur 18 ulih ngundi suba, perintah Pakatan Harapan (PH) maya nya udah bisi niat bejalaika atur nya sebedau Pengawa Bepilih Besai Ke-15 (PRU15).
