Ungkus kuarantin lebih RM15 juta sebulan

KUCHING: Perintah Sarawak ngena belanja lebih RM15 juta ninting bulan ungkup ungkus kuarantin ngagai anak Sarawak berengkah ari bulan September taun nyin kemari dikena nagang pengerekai Covid-19.

Menteri Dagang Temuai, Seni enggau Main Asal, Datuk Abdul Karim Rahman Hamzah madahka inisiatif nya mandangka penyiru perintah menua nyaga pengelantang rayat iya.

“Ungkus nya semina mayar hotel endur kuarantin lalu Perintah Sarawak melanja penuh sereta nadai nengeri bukai ti bejalaika inisiatif baka tu,” terang Karim pengudah bejadika Bas Elektrik, ditu kemari.

Lebuh ngatur randau enggau pengempu hotel taun nyin kemari, Karim madahka iya nerima sebana ari sida laban pengusung ke diau bemalam ba hotel nya balat kusut beduudk ari Atur Mindah Betagang (PKP) sertea adan menua ditutup.

“Tang diatu aku nadai agi ninga sebana laban mayuh hotel udah nyadi palan kuarantin kelimpah mantu sida terus bedagang maya penusah besai tu,” terang iya.

Suara Sarawak