KOTA SAMARAHAN: Universiti Malaysia Sarawak (UNIMAS) dichiri nyadi Mandal Chairman Hab Juluk Pemansang Meruan (SDG) 15: Life on Land ungkup kluster Outreach and Partnership nengah inisiatif Empas Akademik Gerempung Bansa Beserakup (UNAI) lalu berengkah diterit kenyau ari Disember 2025 nyentuk Disember 2027.
Pengawa nyiri nya digaga pengudah UNIMAS mujur dipilih ba renggat global sereta ngalahka lebih 330 institusyen pelajar tinggi ti bukai ari serata dunya.
Bepelasarka pangku pengawa baru nya, UNIMAS deka ngetuai inisiatif ngaul sereta nanggam kerejasama strategik dikena negap pengawa bejalaika Agenda Pemansang Meruan 2030 nyadi sebagi ari rentayan UNAI ti mungkur lebih 1,700 universiti enggau kolej di lebih 150 menua.
Mandal Chanselor UNIMAS, Profesor Dr Ahmad Hata Rasit madah, raban sida chukup temegah enggau pengawa ngaku ba renggat antarabansa nya.
Iya madah, nya mandang aspirasyen universiti nyadi institusyen bepuguka komuniti ungkup pemeruan dunya nengah kerejasama strategik.
“Pengawa nyiri tu seriris enggau komitmen betampung UNIMAS ba inisiatif rampa menua, rikod pemeruan ti silik, program pemeruan rampa menua, pengawa ngadungka kampus sereta inisiatif mutar ubah klimet.
“Tu mega muka lambar baru ba pengawa negap kerejasama meraka sektor dikena nentu pemeruan pengidup ba darat terus dijaga ungkup rebak dudi,” ku iya ba sebengkah penerang.
Nangkan nya, UNAI madah, pengawa milih UNIMAS nya digaga bepelasarka komitmen universiti nya ngemansang prinsip SDG 15 nengah pansik inovatif enggau ngaul komuniti kelimpah pengulih universiti nya nanggam kerejasama nuju kuing dudi hari ti meruan enggau asi agi.
Hab SDG UNAI iya nya siti institusyen pelajar tinggi ti dichiri rentayan UNAI ungkup ngelaku sekeda SDG nengah pengawa ngena pangku pengawa akademik ngambi nyungkak ngagai ubah sosial, ekonomi sereta rampa menua ti positif seriris enggau semua 17 SDG ti bela bepanggai ba pangan diri.
Ungkup ngulih penerang silik pasak kohort Hab SDG UNAI enggau aktiviti bekaul, mensia mayuh ulih neresa website UNAI SDG Hub Network/United Nations.
UNAI iya nya siti inisiatif nyeriris institusyen pelajar tinggi enggau Gerempung Bansa Beserakup (PBB) dikena nyukung sereta mantu nyapai juluk enggau pangku pengawa PBB kelebih agi ngemansang Agenda Pemansang Meruan nengah pelajar enggau inovasyen.
