‘Uptown Cat VI’ diatur pengelama tiga bulan

KUCHING: Pengawa mandangka mayau tauka ‘Uptown Cat VI’ deka dipejalai sepengelama tiga bulan berengkah kemari (16 Ogos) nyentuk 17 November tu ila.

Datuk Bandar Kuching Utara (DBKU) Datuk Abang Abdul Wahap Abang Julai madah ba pengawa tu diatur beserimbai enggau Hari Ngintu Mengeri Kuching Ke-31.

“Tuju ngatur pengawa tu endang deka ngelakuka Muzium Kucing nyadi palan dagang temuai ari dalam enggau luar Sarawak.

“Pia mega, bala temuai ulih belajar sereta ngambi penemu ti tau nyadi malin lebuh nupi mayau,” ku iya.

Abang Wahap bejaku munyi nya lebuh bejadi Pengerami Mandangka Uptown Cat VI di Muzium Kucing ditu, kemari.

Datuk Abang Abdul Wahap Abang Julai

Kelimpah ari nya, iya madahka program tu ulih meri penyedar sereta pelajar pasal mayau nengah seni nyura.

“Pekara mandangka mayau tu mega disereta enggau Pekit Nempa Seni enggau Pekit Nyura Mayau 3D.

“Bisi 18 bansa program bukai deka diatur beserimbai enggau program tu,” ku iya.

Kemari pekit nyura mayau udah diatur lalu siku nembiak ari UiTM Noraziah Mohd Razali nyadi champion, ditangkan lumur dua enggau tiga iya nya Mohammad Shahmizan Awang Yaman enggau Chai Cheau Sin.

Sida tiga mai pulai perais mata duit RM800, RM500 enggau RM300, trofi enggau hamper.

Pekit nyura tu disereta nembiak ari palan pelajar tinggi baka UiTM, Unimas, Kolej Sidma, Lim Kok Wing enggau Swinburne.

Uptown Cat kala diatur kena taun 2009, 2010, 2012, 2014 enggau 2016. Kena taun 2018 Uptown Cat tu dikinsil nyentuk ngagai taun tu.

Abang Wahap sekali agi ngangau mensia mayu ti rindu meda mayau tau sampal ngusung Muzium Kucing di DBKU ditu.

Sama datai kemari Direktor DBKU Dr Morshidi Ahmad enggau bala bukai.

Suara Sarawak