DARA bajik tampun puji ti benung ngari ke Malaysia kelebih agi ba Tanah Kenyalang ba panggau Miss Grand International 2025, Viviana Lin Winston narit perati bala akim dunya lebuh mandangka kostum The Queen of Terabai Iban tauka disebut Kumang Terabai Iban.
Pemanah kostum dikena dara bajik bechura pirak nya lalu penuh enggau terabai Iban ngundan besai reti kelebih agi ngenang tipan pengidup bansa kitai Iban.
Kostum tu mai reti indu ukai semina berani tang mega penyaga pesaka bansa lalu terabai ti nyangking tubuh Viviana nunjukka terabai nyadi penyaga mensia, adat asal enggau pengarap kitai.
Pemanah kostum Viviana tu mega ngundan seribu reti sereta digembar ngena pementas enggau pemerani raban indu.
Konsep Kumang Terabai Iban tu mai reti indu nyadi tokoh ti besai reti nyagu pesaka bansa.
Disagu bepelasarka pesaka lama Iban, konsep tu digembar ngena pekayan asal enggau motif ti nyeremin ‘pengaruh’ indu ngaga pemutus enggau ba pengidup komuniti.
Berindik ari nya, baju dikena Viviana tu nyadi lambang pengeran ngangkatka raban indu nengah pesaka bansa seraya mandangka penau ngemudi chara lama enggau moden.
Tambah mega, lima iti terabai nyengkaum dipegai Viviana empu sereta burung Kenyalang ti nyadi lambang nengeri Sarawak besai endar reti laban iya mai nama Tanah Kenyalang enggau Malaysia pegari ba panggau dunya.
Terabai nya mega lambang identiti bansa ti chukup dikemegah kitai lalu gah dipandang ba panggau antarabansa.
Nya alai, kitai besampika pemujur Viviana lalu terus mai nama Tanah Kenyalang pegari maya bepadan enggau pemekit ari menua bukai.
