INDUN SILONG
suarasarawak.sv@gmail.com
SERIAN: Pengerami Gawai di Kampung Tarat Melawi taun tu besai reti lebuh program tanggungpengawa rama korporat ‘Drive Gawai Life 2025’ ti diatur Yayasan PETRONAS meri pemaik ngagai 150 penerima bantu pemakai ba Bagi Menua Serian.
Menteri Pelajar, Inovasyen enggau Pemansang Penau Sarawak, Datuk Sri Roland Sagah Wee Inn madah, iya meri terima kasih ngagai PETRONAS ti enda ngetu meri sukung ngagai komuniti menua pesisir nengah mayuh macham inisiatif.
“Program baka tu ukai semina ngintu Gawai aja, tang nyadi manifestasyen semangat begulai enggau pengibuh ngagai sida ti begunaka bantu, nipak ulah pekara rama ti dikemeran di nengeri tu.
“Yayasan PETRONAS ti nyadi kompeni minyak enggau gas nasional bejalaika aktiviti tanggungpengawa besai ngemujur program pemansang komuniti, kelebih agi di Tanah Kenyalang,” ku iya.
Sagah bejaku munyi nya rambau bejadi Program Drive Gawai Life 2025 ba Balai Kampung Tarat Melawi, Serian ditu tadi.
Ku iya, inisiatif ti dipejalaika Yayasan PETRONAS ngembuan tuju deka ngenegapka mensia mayuh enggau chara inklusif sereta meri sukung ngagai raban ti ditinggang penusah, nipak juluk pemansang ti meruan.
Sagah nyemetak madah ke penyerakup nyadi elemen ti beguna dalam Strategi Pemansang Pengudah COVID-19 (PCDS) 2030 dipejalai Perintah Sarawak, dikena nentuka penyulut ekonomi ulih diasaika semua rayat.
