INFO

NAMA: Yen Jebeni

UMUR: 35 taun

ANAK KE BERAPA: Anak kedua ari enam menyadi

STATUS: Belaki

TIKAS PELAJAR: Degree

PENELEBA GAWA: 2013- Yahos School of Skills, Kuching
2015 – I-System College, Kuching

“NUAN meseti bebida ari indu Iban bukai, kereja pengawa ti enda mayuh indu bukai ulih ngereja pengawa nya.”

Jaku peransang ari mentor Norina Umoi nya mih meransang Yen Jebeni nyerungkai dunya dagang enggau pengawa betanam betupi.

Dara bajik asal ari Menua Benak Pangka Pasang madah ke jaku peransang nya meruan dikeingat sereta meransang iya.

Tambah mega ku Yen, Norina semampai ngiring, meri jaku ajar enggau meransang ngambi bebendar enggau puh nyerungkai pengelebih dunya dagang.

Kebuah pia laban Yen chukup pechaya, dunya dagang tu endang bisi pasang surut lalu iya semampai sedia napi penguji nya.

“Aku sigi udah dulu ngadang, dunya dagang enggau pengawa betanam betupi tu endang bisi pasang surut lalu diatu nyau nyadi pengawa ti chukup dikerindu.

“Penguji ti datai nuntung enda ngelemi semangat tang nya nyadi peransang enggau pengering ngambi aku enda mudah alah laban penguji.

“Baka ditemu kitai, produk pemakai sigi mayuh semekih lalu kitai meseti nengkebang produk ti nyelai enggau mayuh peminta.

“Nya kebuah, aku ngepunka dagang ti diberi nama, Lalau Farm ti nyadi lubuk jereki aku diatu,” ku Yen.

Ngenang silik, iya madah ke nama Lalau Farm tu diambi ari endur diau iya nya Sungai Lalau, Entawa Undop, Sri Aman.

Terang Yen, dia mih endur kebun sayur enggau pisang sereta endur nupi jelu.

PRODUK DIRI

Ngenang pejalai dagang diri, Yen madah ke iya berengkah ngaul diri ba pengawa betanam betupi ari taun 2017.

Taja lebuh nya baru beumur 27 taun tang iya chukup pechaya umur ukai nyadi penekul ngepunka siti-siti pengawa asal diri empu sedia napi penguji, rindu nyerungkai produk baru lalu pemadu beguna, ransing ngiga penemu.

Taja napi mayuh penguji maya baru ngepunka dagang tang Yen liat ati laban tu endang pengawa dikerindu iya.

Bepun ari dichabar, betanam betupi udah nyadi pengawa ti chukup dikerindu iya.

Ku Yen, entara utai ti bisi ditanam diatu iya nya pisang kapuk enggau terung Iban.

Yen mega deka nanam mayuh agi ensabi laban deka mansutka produk kasam ensabi enggau bisi nupi babi.

Ari pengawa nanam pisang, iya mega bisi ngerandang dagang kerepek pisang.

“Laban suah mantaika aktiviti diri ba Facebook, nguring kerepek dikena ngirup kupi lemai hari lalu bisi siku dua minta digaga lalu deka meli kerepek nya.

“Meda mayuh peminta, aku pen berengkah ngaga kerepek ngujungka bisi peminta meli 500 kuntina kerepek.

“Enda nyangka endar produk kerepek aku laku nyentuk diatu lalu naka diatu, aku bisi ngaga kerepek pisang cheese, original, manis, kulat, bisa enggau sambal empikau,” ku iya.

DIEMBING

Nampung randau ke dalam agi, Yen mega madah orang ti mayuh ngajar senentang dagang pemakai tu iya nya siku ari pedagang ti jauh nyulut ba pengawa dagang iya nya Rokiah Bansing ari Balau Agrotec, Sri Aman.

“Iya mih ti mayuh ngajar aku seling dunya dagang.

“Iya udah ngajar aku chara packaging, marketing enggau nerang ni bagi ejensi ti patut endur aku minta bantu dudi hari.

“Aku mega nerima sukung ari sukut puku belanja ari laki aku, iya mayuh nyukung pengawa aku ngelama tu,” terang iya.

Ngenang pengelebih enggau pengelemi, Yen madah ke pengelebih ti diasai iya nya produk pemakai bulih mayuh timbal sereta muntang dikereja.

Seraya ari sukut pengelemi, peminta chukup mayuh tang bahan mata kurang sereta tusah digiga.

Ukai naka nya aja, Yen mega madah, dikena ngerumban jam nembu ke tagit begunaka mesin dikena nguring kerepek.

“Ke diatu, aku ngena chip cutter aja nyirap pisang lalu guring dalam kali,” ku seraya madah ke naka diatu peminta chukup mayuh kelebih agi sebelah Sri Aman enggau Kuching.

Baka pedagang bukai, Yen mega ngelaku produk diri nengah chara digital kelebih agi ba ruai Facebook.

“Taja pen singkang aku diatu agi lubah, tang aku chukup pechaya ke jereki ti udah diberi Petara laban sigi minat ngereja pengawa dagang.

“Aku ngepunka dagang tu ngena puku RM1,000. Nya mih dikena aku bebeli ke design sticker, printing sticker, packaging, chips cutter, sealer, pisang mata, serebuk perasa baka cheese, chabi, gula enggau garam,” ku iya seraya madah ke nadai ngaji pengereja naka diatu laban disaup sida sebilik.

CHARA

Ngenang chara ngaga kerepek, Yen madah terubah iya ngupak kulit pisang lalu isi pisang nya direndam ngena ai garam ngambi isi enda chelum gasak getah pisang.

Udah nya, minyak makai asuh angat dulu dalam kali, pengudah minyak angat baru nyirap pisang nya ngena chips cutter.

Pengudah pendiau kerepek nya bisi kuning mimit, angkat k kerepek ari kali lalu champur kerepek nya tadi ngena perisa ti dikedeka.

Ujung sekali tu iya, engkah kerepek dalam kuntina baru kitai ngelekat ke sticker.

Yen nerang ke pengawa ngaga kerepek tu bisi pemar laban ngena jari tauka chips cutter.

“Pengawa tu bisi lubah mimit laban aku ngena siti dapur gas ti semina ulih mansutka dua kilogram pisang sejam.

“Kedua, tusah bulih bahan mata baka pisang enggau ti bukai,” ku Yen bekunsi pemar ti udah nyadi asam garam ba dunya dagang.

Nambah ke nya, iya madah ke produk bukai ti deka digaga iya nya sambal lalu diatu benung ngatur bakut ensabi laban deka mansutka produk kasam ensabi.

“Ari kandang babi aku empu deka mansutka produk salai babi,” ku iya seraya madah ke kerepek, ensabi enggau salai babi entara produk pemakai ti bisi pengulih besai laban nya pemakai ti dikerindu kitai Sarawak.

MERI SUKUNG

Tiap kitai udah tentu bisi juluk ati, sama mega enggau Yen ti keran deka nulung diri empu nambahka penatai pemisi ruang bilik lalu nyaup orang bukai.

Kebuah pia laban dagang kerepek tu ukai semina nambah penatai pemisi ngagai iya empu tang mega ngagai orang bukai.

Ambi ke chunto, orang ti bisi betanam pisang kapuk ulih nyual pisang sida ngagai Yen ti berega RM2.50 sekilo.

“Tu mih chara aku mantu diri empu enggau orang bukai lalu ngarap semua produk aku majak nerima timbal sereta sukung.

“Aku mega deka nguji minta bantu ari ejensi perintah bekaul. Ngarap ke bulih tulung sereta sukung ngambi dagang maju enggau lanchar agi.

“Dunya diatu udah jauh berubah, enda baka suba. Enti suba pengawa betanam betupi dipeda semina dikereja orang ti nadai besekula tauka nadai pemandai.

“Tang, diatu revolusyen betanam betupi udah jauh berubah ngena chara moden.

“Kena mih peluang tu ngereja tanah ke bisi ba menua diri lalu kena tanah ba menua kitai nyadi mesin duit ti ulih mansutka penatai pemisi,” ku pesan Yen seraya nutup randau.