KUCHING: Kenyau ari 2015 nyentuk 31 Julai taun tu bisi 120 kes rumah panjai angus diripotka nyadi ba Sarawak.
Direktor Opis Bomba enggau Penyah Penusah Malaysia (JPBM) Sarawak, Khirudin Drahman madahka Zon Tengah (Sibu) ngerikodka kes penusah angus pemadu mayuh iya nya 38 kes.
“Sibu ngerikodka penusah angus pemadu mayuh ketegal penyampau rumah panjai ba pelilih nya mayuh.
“Pia mega, akses tauka pejalai bomba ngagai palan penusah angus mar baka jalai sungai,” ku iya.
Khirudin madah munyi nya ba aum pemberita Ripot Perangkaan enggau Statistik Rumah Panjai Angus di Sarawak ungkup 2015 ngagai 2020 (naka 31 Julai 2020) di JPBM Sarawak seharitu.
Ku iya, aum pemberita nya digaga laban piak bomba deka nerang ngagai mensia mayuh pasal statistik penusah angus ti betul.
“Bisi sekeda ketuai raban bansa ti mantaika pengirau ati sida pasal penusah angus laban ngulihka penerang ari penerang bukai ti enda tentu betul.
“Piak bomba ngatur mayuh program enggau bala peranak rumah panjai baka Program Bomba Komuniti enggau licha ngena perengka pemadam api dikena meri penyedar ngagai sida ti diau ba rumah panjai,” ku iya.
